BAUCAU, STLTIMORLESTE.com – Delegasaun Territorial Florestal no Plantasaun Industriais (DTFPI) Munisipiu Baucau prende kilat manu hamutuk 20 resin husi kasador sira iha Baucau.
Koordenador DTFPI Munisipiu Baucau, Pascoal Afonso Belo hateten, dadaun guarda florestal sira neebe Governu rekruta no destaka iha nivel Postu Administrativu sira kontinua halao servisu makaas, iha neebe durante periodu Governu atual guarda sira konsege prende ona sasan bandu sira hanesan kilat manu husi kasador sira iha area juridiku Munisipiu Baucau.
“Hau foin mak mai seidauk too fulan, maibe iha Xefe ida tuan nee too agora ita prende ona kilat manu kuaze unidade 20 ital,” hateten Pascoal ba jornalista sira nia nia knaar fatin Vila Nova Baucau, Kuarta (19/08/2026).
Nia sublina, kilat manu hirak nee prende liu husi guarda florestal sira neebe kada loron halao servisu iha nivel Postu no Suku, tanba lei fauna neebe eziste bandu atu sidadaun sira utiliza kilat manu hodi kasa fali animal no manu fuik sira neebe lei proteje.
Nia fundamenta, mezmu animal sira hanesan rusa no manu fuik sira hanesan kakatua no loriku no seluk tan laos hakiak husi ema, moris mesak iha ailaran, maibe Estadu proteje no la autoriza atu sidadaun sira sai kasador ba sira hodi oho.
“Se ema ruma mak uza armas ba kasa fila fali animal sira iha ailaran, tanba nee ami tau matan ba ida nee, nunee se mak iha kilat karik uza tiru ba imi nia animal sira neebe imi hakiak, maibe imi lori lao tun sae ba kasa animal sira iha ailaran ami prende,” Pascoal akresenta.
Entertantu, kilat manu unidade 20 resin neebe Guarda Florestal Munisipiu Baucau prende entrega hotu ona ba Ministeriu Publiku inkliu ho identidade utilizador sira hodi hatan tuir dispozisaun legal neebe vigora.
(tom)
