DILI, STLTIMORLESTE.com – Daudaun nee Governu liu husi Autoridade Munisipiu Dili hamutuk ho Polísia Nasional Timor Leste (PNTL) atu kria fatin estasionamentu kada bairo sei aplika taxa ba estadu.
Prezidente Autoridade Munisipiu Dili, Fransisco dos Santos hatete, fatin estasionamentu kada bairo sei aplika taxa hodi kontribui reseitas ba Estadu.
Nia dehan, sei kria fatin estasionamentu kada bairo nunee bele mobiliza transporte sira neebe para arbiru. Estasionamentu kada bairo sei aplika taxa ba Estadu ba transporte neebe utiliza espasu.
“Ita buka nafatin espasu publiku ruma iha bairo sira nee para atu kria estasionamentu iha laran, nunee wainhira kareta no motor sira neebe laiha parazen, sira bele ba para iha neeba no asegura iha neeba, sira selu mos taxa ruma, ita boot sira hatene, ema hola kareta nee laos osan kiik, nee osan boot, maibe parazen laiha sira bele para iha neeba hodi selu taxa ba governu, la barak maibe US$ 1 ou US$ 2 hanesan nee,” hatete Prezidente Autoridade Munisipiu Dili, Fransisco dos Santos ba jornalista sira iha nia knaar fatin, Kinta (20/08/2026).
Nia esplika, publiku kestiona katak ida nee ba halo tan povu nia terus, maibe estadu nunka mais halo terus nia povu, buka para rezolve povu nia perokupasaun neebe iha, maibe atu estraga nee laiha.
Iha fatin hanesan, Segundu Komandante PNTL Munisipiu Dili, Supertidente Polisia Luiz da Silva hatutan, sidadaun barak mak hola kareta no motor, maibe laiha espasu propriu hodi estasiona, tanba nee presiza Governu organiza hodi perturba movimentasaun publiku.
“Ema sosa kareta, ema sosa motor, maibe ninia para fatin mak laiha, ita nia orientasaun nee foin ita tun ba, maibe antes nee ema iha ona kareta iha ona motor, tanba nee hanesan PAM koalia nee hakarak ga lakohi Estadu tenke kria fatin ruma nunee kareta ho motor sira ba para iha neeba hodi selu taxa ba Estadu,” nia informa.
Nunee mos Komunidade Nelson Banca dos Santos dehan, kria fatin Estasionamentu iha kada bairo depois selu ba estadu nee diak liu tan, atu nunee hamenus engarrafamentu iha bairo no sidade Dili.
“Se kareta ho motor nain selu estasionamentu kada loron 1 ou 2 nee diak, tanba bele kontribui ba estadu no engarrafamentu laiha, nunee labele para arbiru iha dalan ninin,” nia afirma.
(jen)
