MATEBIAN, STLTIMORLESTE.com – Prezidente Republika (PR), Jose Ramos Jorta hatete, Frente Externa nia luta lori Timor Leste (TL) ba mundu.
Prezidente Republika Jose Ramos Horta hatoo kestaun nee liu husi nia diskursu iha selebrasaun 20 Agostu, hodi selebra ezistensia FALINTIL ba dala 51 iha Foho Matebian, Munisipiu Baucau, Kinta (20/08/2026).
PR hatete, Frente Externa lori Timor Leste nia lian iha mundu ba pais belun sira.
“Frente Externa lori Timor Leste nia lian ba mundu tomak no país belun sira, hanesan País Afrikanu Lian Ofisial Portuges (PALOP), Portugal no Brazil, entre sira seluk, sai hanesan fundamental hodi amplifika ita-nia lian, hametin ita-nia kauza no projeta iha forum no organizasaun internasional oioin,” katak Prezidente Republika.
Vitoria neebe alkansa nuudar mos rezultadu husi forsa diplomasia, solidariedade internasional no kapasidade atu transforma luta povu kiik ida nian ba kauza universal justisa no autodeterminasaun nian.
Iha biban ne Prezidente Republika hatete, presta omenajen ba feto rezistensia sira iha frente hotu-hotu luta nian. Sira mak kombatente sira, mensajeiru sira, enfermeiru sira, responsavela sira husi rede klandestina sira, protetora sira husi família sira no guardiaun sira husi memoria koletiva.
Sira hasoru violensia no lakon pesoal no sira nia aten-barani konstitui espresaun ida neebe aas liu ba forsa moral povu nian. Estudante no ativista joven sira partisipa iha luta klandestina, organiza movimentu solidariedade, defende identidade timorense, hodi loke dalan ba jerasaun ukun-rasik-an.
Ohin, juventude Timor Leste iha misaun foun ida atu transforma legadu neebe sira simu ba responsabilidade atu harii nasaun ida neebe justu liu, dezenvolvidu liu no pasífiku liu.
Xefe Estadu hatete, memoria konaba istoria labele serve deit atu selebra konkista sira pasadu nian. Ida nee tenke inspira haraik an, responsabilidade no kompromisu ida neebe permanente ba futuru. Ida nee mak FALINTIL nia legadu lolos:laos deit vitoria luta ida nian, maibe afirmasaun ba valor sira husi povu ida neebe fiar katak liberdade.
(eme)
