DILI, STLTIMORLESTE.com – Jurista Timor oan konsidera katak, Juiz neebe sei tur iha Supremu Tribunal Justisa (STJ) laos matenek deit, maibe barani foti risku.
“Tuir hau nia hanoin Juiz neebe ba tur iha Supremu Tribunal Justisa laos matenek deit em termos de kapasidade intelektual, maibe barani foti risku bainhira tesi lia em nome do povo liu-liu defende justisa sosial, hodi haree ba sira neebe vulneravel no marzinalizadu,” dehan Jurista Sergio Dias Quintas iha Kaikoli Sesta, (21/08/2026).
Tuir Sergio, ohin loron Juizes Timor oan balu konsidera kualifikadu hodi bele tur iha STJ, maibe nee depende ba komisaun rekrutamenru hodi haree sira neebe priense kriteriu.
Nia sublina, konaba apoiu Juiz internasional ba setor justisa ita kontinua nafatin husu sira nia ajuda liu-liu iha area servisu asesoria nian, maibe laos sira mai atu tesi lia iha Tribunal nee labele, tanba Timor Leste iha ona rekursu humanu sufisiente, laos ita fo soberania estadu ba ema estranjeiru hodi em nome povu halo fali justisa ba ita.
Iha fatin ketak, Akademiku UNTL, Rafael de Jesus dehan, presiza duni Juiz neebe iha kapasidade diak atu halao knaar iha STJ.
“Hanoin presiza duni iha Juiz neebe kapasidade diak hodi halao servisu iha STJ, hodi lori justisa lao ba oin,” dehan nia.
Hatutan tan, justisa atu lao ba oin presiza ema neebe iha kapasidade diak, halao knaar tuir lei haruka atu lori justisa lao ba oin no balansu.
Esplika, tenke harii ona STJ tanba ohin loron publiku barak sei kestiona, tanba kazu balu mezmu sira hakarak kontinua lao ba oin. Maibe ho deit Tribunal Rekursu (TR) sira labele halo buat ida, tanba desizaun neebe TR foti hanesan ona ultima desizaun.
(ter)
