DILI, STLTIMORLESTE.com – Kompaña Operasaun Espesial (COE) iha Unidade Espesial Polísia (UEP) ohin realiza marsa lao ain ho uniforme kompletu husi Cristo Rei too iha baze Kuartel UEP, Dili, atu komemora aniversariu ba dala-22 ezisténsia COE nian.
Atividade marsa lao ain nee komanda diretamente husi Komandante UEP, Komisáriu Asistente Polísia Agustinho Gomes, no envolve membru sira husi COE, marsa lao ain nee nuudar parte husi programa komemorasaun aniversáriu tinan 22 COE, eziste iha Unidade Espesial Polísia.
Depois marsa lao ain hahu husi área Cristo Rei no kontinua too iha baze Kuartel UEP, atividade nee sai hanesan momentu importante atu hametin disiplina, solidariedade, espíritu korpu no prontidaun operasional entre membru COE.
Entretantu Komemorasaun tinan 22 COE mos reflete kompromisu Unidade Espesial Polísia halao nia responsabilidade, liu -liu apoiu ba PNTL atu mantein seguransa no ordem publika tuir lei no prinsipiu profisionalizmu.
Enkuantu Kompaña Operasaun Espesial (COE) nuudar parte importante iha Unidade Espesial Polísia, neebe kontinua dezenvolve kapasidade no preparasaun membru sira atu responde ba situasaun operasional neebe presiza prontidaun no disiplinu aas. Komemorasaun tinan 22 ezisténsia COE iha UEP sai mos nuudar oportunidade atu rekoñese dedikasaun no servisu membru sira, no hametin komitmentu atu kontinua fo servisu diak ba PNTL no povu Timor Leste.
(jen)
