DILI, STLTIMORLESTE.com – Sekretariu Estadu Kooperativas (SEKoop), Arsenio Pereira da Silva fo pose ba Dirijente no Fiskais Kooperativa Mutisektoral Communal Egalitarian (CMS-CE) ba iha periode 2026-2031 nian.
Serimonia tomade de pose ba Dirijente Diretivu nain 5 no Fiskais nain 3 mak hanesan, Prezidente Diretivu, Juvelino Gomes Bianco Barros, Vise Prezidente Higino Tracisio Correia Barros, Sekretaria Natalia Rocha da Costa, Tesoreiro Nazario Bernardino Soares, Vogal Sofia Conceicao de Deus, Prezidente Fiskais, Margaretha Viegas Mali, Sekretariu Carlos Fernandes, no Vogal Martinho Pereira.
Objetivu hili no fo pose ba Dirijente sira, oinsa hodi lidera kooperativa nee ho diak.
Tanba nee, antes atu fo pose, fo uluk formasaun ba funsionariu sira atu komprende saida mak kooperativa no knaar kooperativa nee.
Liu husi diskursu, SEKoop, Arsenio Pereira da Silva fo parabens ba estrutura foun neebe ohin simu pose hodi sai Dirijente Diretivu no Fiskais nian ho responsabilidade.
“Ohin prosesu neebe ita halao, konselhu neebé ita lidera haree ba iha estrutura nee espertu iha kooperativa, tanba servisu kleur ona iha area kooperativa,” hatete SEKoop, Arsenio Pereira da Silva liu husi nia diskursu iha ambitu tomada de pose ba Dirijente iha Salaun CNE Colmera, Sesta (21/08/2026).
Membru Governu nee husu ba hirak neebé foin hamutuk ho sira, aprende, tanba nee tau fiar ba estrutura hodi bele jere ita ba iha kooperativa ida nee, husu atu servisu hamutuk nafatin hodi lori kooperativa nee lao ba oin.
Iha fatin hanesan, Prezidente Diretivu, Juvelino Gomes Bianco Barros hatete, kooperativa sai hanesan baze ekonomia, tanba nee husu membru sira transparansia hodi lori kooperativa lao ba oin.
“Ami sei la servisu mesak, desizaun hotu sei mai husi ema hotu nia hanoin, sira bele hetan planu neebe diak ho hanoin ida deit dezenvolve rai ida nee,” dehan nia.
(joa)
