DILI, STLTIMORLESTE.com — Estudante Timor Leste (TL) hamutuk ema nain 45 hetan oportunidade atu kontinua estudu iha universidade 16 iha Indonézia, liu husi programa bolsa estudu Governu Indonézia ba períodu 2026.
Serimónia despedida ba estudante sira ne’e hala’o iha Sentru Kultura Indonézia, Dili, Segunda (24/08/2026), hahu ho orasaun neebe prezide husi Amo Urbanus Bunga Lolon, SVD, kontinua kanta Hino nasional Indonezia, Hino nasional TL no deskursu.
Reprezentante Governu Repúblika Indonézia iha TL, Raden Sakunto Paksi hateten katak, estudante sira ne’e liu ona prosesu selesaun ne’ebé maka’as antes hetan oportunidade atu simu bolsa estudu. Husu estudante sira atu aproveita oportunidade ne’e ho diak no fila fali ba TL ho konhesimentu no esperiénsia atu fó kontribuisaun ba dezenvolvimentu nasaun.
“Imi mak ema sira ne’ebé hili, diak liu no fiar atu kontinua edukasaun. Futuru TL iha imi nia liman,” dehan Raden Sakunto Paksi iha serimónia despedida.
Nia esplika katak, iha períodu 2026, Governu Indonézia oferese programa bolsa-estudu oi-oin ba estudante husi TL, inklui Indonesia Kemitraan Negara Berkembang (KMB), Darmasiswa no Indonesia Scholarship Program for Innovation, Research and Excellent (INSPIRE).
Husi programa sira ne’e, benefisiáriu KMB hamutuk 11 ema, Darmasiswa 3 ema no programa INSPIRE 1 ema. Total estudante Timor-Leste ne’ebé sei kontinua estudu iha 16 instituisaun edukasaun superior iha Indonézia hamutuk 45 ema. Interese estudante TL ba bolsa-estudu Governu Indonézia konsidera aas.
Raden hateten katak, ba Indonesia Scholarship iha tinan 2026, kandidatu ne’ebé submete aplikasaun besik 1.600 ema, maibé estudante ne’ebé pasa prosesu seleksaun no hetan oportunidade bolsa-estudu hamutuk 45 ema.
Iha biban nee, Diretor Prinsipal Instituisaun Fundu Kooperasaun Dezenvolvimentu Internasionál, Dalyono, liu husi videokonferénsia hateten katak, programa bolsa-estudu Indonézia la’ós de’it atu dezenvolve rekursu umanu, maibé mós atu hametin relasaun no kooperasaun entre Indonézia no nasaun sira parceira, inklui TL.
Dalyono subliña katak, estudante sira ne’ebé estuda iha Indonézia, bele sai ponte importante ba hametin relasaun bilateral iha futuru, la’ós de’it iha área edukasaun, maibé mós iha ekonomia, finansas, investimentu no komérsiu.
“Hau hanoin, Programa sira ne’e esperadu bele hamosu lider no alumni sira ne’ebé iha kapasidade atu fó kontribuisaun ba dezenvolvimentu nasaun no hametin relasaun Indonézia ho TL,” nia hateten.
Iha oportunidade hanesan, Visi Primeiru Ministru Timor Leste no Ministru Koordenadór Asuntu Sosial no Ministru Dezenvolvimentu rural no abitasaun komunitaria, Mariano Assanami Sabino, hato’o agradese ba Governu Indonézia tanba apoiu liu husi programa bolsa-estudu ne’ebé fó oportunidade ba joven TL atu dezenvolve kapasidade no koñesimentu.
Mariano hateten katak, dezenvolvimentu rekursu umanu sai parte sentral iha planeamentu estratéjiku Timor Leste. Tanba ne’e, oportunidade edukasaun no kooperasaun ho nasaun sira seluk, liu-liu Indonézia, importante tebes ba dezenvolvimentu nasaun.
Nia mós husu estudante sira atu aproveita oportunidade estuda iha Indonézia, la’ós de’it atu hetan diploma, maibé atu dezenvolve koñesimentu iha siénsia no teknolojia, inklui teknolojia dijitál, ne’ebé bele uza atu acelera dezenvolvimentu TL.
Mariano subliña katak, estudante no joven Timor Leste iha responsabilidade importante atu uza koñesimentu no esperiénsia ne’ebé hetan durante estudu iha rai-liur hodi fó kontribuisaun ba dezenvolvimentu sosial no ekonómiku TL.
Serimónia despedida ne’e sai mós parte husi esforsu hametin kooperasaun edukasaun no relasaun bilateral entre TL no Indonézia, liu husi investimentu iha rekursu umanu no oportunidade edukasaun ba joven sira.
(jos)
