BAUCAU, STLTIMORLESTE.com – Komunidade sira iha Star Motor, Vila Antiga, Baucau Vila, Munisípiu Baucau, hato’o ona keixa dala 20 resin ba Polísia Eskuadra Postu Baucau Vila kona-ba asaun tuda uma, maibé seidauk iha rezultadu kona-ba identifikasaun no kaptura autor.
Reprezentante komunidade ne’ebé sai vítima, José Agostinho Dias Marçal aprezenta, asaun tuda uma iha área Star Motor akontese kedas husi tinan 2022 to’o Agostu 2026, maioria akontese iha tempu kalan, bainhira komunidade sira deskansa, nune’e vítima sira la konhese autor, maibé kada asaun tuda akontese sempre informa ba Polísia Eskuadra Postu Baucau Vila, maibé durante tinan naruk ne’e seidauk iha identifikasaun klaru husi Polísia kona-ba autor.
“Tuda nee biasa akontese iha kalan, bainhira ami deskansa. Uma 10 resin mak hetan tuda iha ne’e. Bainhira akontese ami ba hato’o keixa iha Eskuadra. Keixa ne’e mai hatoo dala 20 ona hanesan ne’e maibé to’o agora parte intelijénsia mos seidauk halo identifikasaun,” hateten José Agostinho Dias Marçal ba jornalista sira iha Star Motor, Tersa (25/08/2026).
Nia hateten tan, asaun tuda uma ne’e rezulta ema balu hetan kanek, kalen uma kuak, motor no kareta balu rahun, no sasan seluk mos hetan estragu.
Tuir José, situasaun ne’e mos hamosu presaun psikolojiku ba uma nain sira, tanba komunidade seidauk hatene motivu husi asaun tuda ne’e.
“Ami komunidade iha nee nunka halo problema ho ema ida. Husu boot ba autoridade atu tau matan ba asuntu ne’e, tanba ida ne’e ameasa boot ba ami. Tanba diak ida tuda ona ne’e too oras ida hanesan ne’e mak foin para,” nia hateten.
Komunidade Star Motor ne’e mós rekomenda ba autoridade seguransa atu konsidera estabelese Postu Seguransa Polísia iha área baliza Lamegua no Star Motor, tanba tuir informasaun, fatuk sira ne’ebé tuda ba uma komunidade mai husi diresaun husi área Lamegua nian.
Iha fatin hanesan, komunidade Xisto Ximenes Siqueira sublina, asaun tuda uma ne’e akontese iha tempu kalan no bainhira akontese vítima sira sempre hato’o keixa ba Polísia, maibé seidauk iha rezultadu kona-ba kaptura autor.
“Ami la kontente tanba ita hakarak goza ukun rasik aan ida nee, maibé ema halo fali hanesan nee. Ami hakarak moris hakmatek. Uma ita halo diak atu uza, la’ós atu sai alvu ba tuda fatuk,” hateten Xisto.
Nia hateten, joven sira iha área Star Motor balu envolve iha organizasaun arte marsiais, maibé sira nunka halo problema ho komunidade ka ema sira ne’ebé lao liu iha área Star Motor.
“Hau nia oan sira iha nee tama organizasaun, maibé ida-idak ba buka servisu. Atu mete problema nee, laiha,” nia hateten.
Xisto husu Polísia atu trata séria keixa sira ne’ebé komunidade aprezenta ona no halo investigasaun hodi identifika no kaptura autor sira, tanba se asaun ne’e kontinua sem resposta, bele afeta seguransa no hakmatek komunidade.
Liga asuntu ne’e, STL tenta konfirma informasaun refere ho Komandante Polísia Eskuadra Postu Baucau Vila, maibé seidauk hetan komentáriu. Tenta konfirma mós Komandante Komando Polísia Munisípiu Baucau mos seidauk hetan resposta.
Observasaun STL iha edifísiu Polísia Eskuadra Baucau Vila hatudu katak komunidade vítima husi área Star Motor aprezenta tan ona keixa kona-ba asaun tuda uma ne’ebé sira enfrenta.
(tom)
