DILI, STLTIMORLESTE.com — Visi Primeiru Ministru, Francisco Kalbuady Lay agradese Prezidente Republika (PR) no Primeiru Ministru (PM) ba inisiativa no apoiu sira hodi realiza Simeira Siénsia ba Dezenvolvimentu ho susesu.
Visi Primeiru Ministru Francisco Kalbuady Lay, ne’ebé mos komisaun organizadora, hatete eventu ne’e hetan apoiu tomak husi Prezidénsia no Governu, liu husi orientasaun Primeiru Ministru, no konsege halibur sosiedade sivil, estudante universitáriu, membru Governu, peritu, sientista no espesialista teknolojia.
“Ha’u agradese tebes ba maun boot na’in rua, nai Prezidente Republika no Primeiru Ministru. Inisiativa ida-ne’e mai husi Prezidente Republika, no hetan apoiu tomak husi Governu,” dehan Kalbuady.
Nia hatete, Simeira ne’e hala’o durante loron rua, hahu husi segunda-feira to’o tersa-feira, ho partisipante sira nakonu iha CCD, hahú husi sala laran to’o liur.
Kalbuady afirma, eventu ne’e importante tebes tanba Timor-Leste konsege konvida personalidade internasionál, inklui Laureadu Nobel da Pas, peritu, sientista, espesialista intelijénsia artifisiál (AI), professor no doutor sira.
“Konsege konvida ema klase hanesan premiadu ne’e buat boot ida. Timor-Leste liu husi lideransa Prezidente no Primeiru Ministru konsege halibur ema lubuk ida, inklui peritu, sientista, teknólogu AI no professor doutor, hamutuk 48 pesoas,” nia hatete.
Nia konsidera, partisipasaun estudante universitáriu no sosiedade tomak iha Simeira ne’e hanesan benefísiu importante, tanba sira bele rona diretamente esperiénsia, análize no koñesimentu husi peritu internasionál sira.
“Ha’u kontente haree partisipasaun husi estudante universitáriu no ema lubuk ida ne’ebé partisipa husi loron primeiru to’o enseramentu. Ha’u rasik, nu’udar membru Governu no sidadaun, aprende buat barak husi painel sira,” dehan Kalbuady.
Nia hatete, ekipa Governu no Prezidénsia sei prepara rezumu husi rezultadu Simeira ne’e atu fahe ba estudante, sosiedade sivil, membru Governu no parte relevante sira seluk.
Ministra Solidariedade Sosial no Inkluzaun, Veronica das Dores, mos hato’o agradese ba Prezidente Republika no Primeiru Ministru, tanba inisiativa realiza Simeira Siénsia ba Dezenvolvimentu ne’ebé halibur peritu, sientista no laureadu sira hodi fahe koñesimentu ba estudante no joven sira iha Timor-Leste.
Nia subliña katak, dezenvolvimentu teknolojia tenke akompaña ho esforsu atu prevene no proteje labarik no feto joven sira husi risku sira ne’ebé bele mosu iha ambiente dijitál.
Iha enseramentu, Prezidente Republika José Ramos Horta hatete, objetivu enkontru ne’e la’ós de’it atu lori koñesimentu mai Timor Leste, maibé atu kria koñesimentu hamutuk ho Timor Leste.
“Ha’u hein katak relasaun sira ne’ebé hahú iha Dili sei kontinua liu husi Simeira ida-ne’e. Konvidadu distintu barak hatete katak sira hakarak kontinua iha ligasaun ho Timor-Leste liu husi mentoria ba joven sira, fahe konsellu no koñesimentu, apoia parseria iha peskiza no akademia, ka kontinua troka ideia ne’ebé ita hahú ona,” dehan Prezidente.
Prezidente Ramos Horta mos hato’o nia agradese ba generosidade husi konvidadu sira no konvida sira atu kontinua sai parte husi viajen dezenvolvimentu Timor Leste.
(eme)
