DILI, STLTIMORLESTE.com – Setor privadu Timor Leste presiza preparasaun, kapital no kualidade atu hasoru kompetisaun merkadu ASEAN no dezenvolve ekonomia.
Diretor Kompañia Green Pzz, Lda., Rony Joel Barreto da Costa, hatete setor privadu lokal tenke iha korajen atu investe iha rai laran no prepara-an atu hasoru kompetisaun.
“Hau senti merkadu nee kompetitivu tebes iha setor turizmu nian. Nudar nasaun TL, ita tenke hatudu preparasaun ne’ebé diak no barani investe iha ita nia rai,” dehan Rony ba STL iha Farol, Segunda (24/08/2026).
Nia konsidera investimentu iha turizmu importante tanba bele loke dalan ba emprezariu seluk, aumenta kresimentu ekonomia rai laran, kontribui ba reseita estadu no kria benefísiu ba komunidade.
Rony mos hatete, investimentu hasoru risku oioin, liuliu presiza kapasidade finanseira ne’ebé diak. Aumentu folin kombustível sai dezafiu ida ba emprezariu, espesialmente emprezariu lokal sira ne’ebé iha kapital limitadu.
“Tanba ita mos parseria ho ita nia banku atu bele fasilita kapital. Dezafiu seluk mak tenke priense kritéria ne’ebé estandar ba iha otelaria, iha setor turizmu nian,” nia dehan.
Nia subliña, konstrusaun hotel la’ós deit kona-ba harii edifísiu, maibé tenke asegura kualidade no kumpre padraun internasionál iha setor otelaria.
Iha parte seluk, estudante finalista Fakuldade Ekonomia, Universidade Nasional Timor Lorosa’e (UNTL), Mario Bareto, dehan setor privadu mak “liman-ain” governu nian iha prosesu dezenvolvimentu nasional.
Nia husu empreza lokal sira atu uza kapital ho responsabilidade no la depende deit ba apoiu governu. Tuir nia, investimentu tenke fó benefísiu ba públiku, inklui liuhusi pagamentu taxa ba estadu no kriasaun kampu servisu ba Timor-oan.
Mario mos rekomenda empreza lokal sira atu hahú ho kapital rasik, maski ki’ik no limitadu, atu nune’e bele evita dependénsia excesiva ba governu.
Antes ne’e, Ministru Obras Públika, Samuel Marsal, dehan setor privadu tenke servisu ho komitmentu atu ajuda governu iha dezenvolvimentu nasional.
Nia husu setor privadu la’ós atu buka lukru ba interese rasik deit, maibé mos konsidera benefísiu ba komunidade no nasaun.
(dom)
