DILI, STLTIMORLESTE.com – Xefe Estadu Maior Jenerál FALINTIL-Forsa Defeza Timor Leste (F-FDTL), Tenente Jenerál Domingos Raul “Falur Rate Laek” sai orador iha Universidade Nasional Timor Lorosae (UNTL), hodi koalia konaba papel forsa defeza nian ba dame no unidade.
Nia dehan, Seminariu ho tema “Papel Forsa Defeza Timor Leste nian: Harii Pas, Unidade Nasional, no Lisaun sira husi Pasadu hodi Hari’i Identidade Nasionál” nee parte husi komemorasaun loron nasionál kriasaun FALINTIL no selebrasaun Konsulta Populár 30 Agostu.
Iha nia diskursu, Tenente Jeneral Falur Rate Laek tenik, dame iha Timor Leste la mai husi dekretu maibe husi servisu loron-loron. Nia dehan FALINTIL moris hodi liberta territóriu, enkuantu F-FDTL ohin loron eziste atu konsolida liberdade liu husi estabilidade, disiplina no servisu institusionál.
“Hau koalia laos nuudar polítiku, maibe nuudar militár no Xefe Estadu-Maior Jenerál neebe uluk kaer kilat ba rai ida-nee. Fatin apropriadu liu atu reflete kona-ba futuru nasaun nian maka iha universidade,” hatete Xefe Estadu Maior Jenerál F-FDTL, Tenente Jenerál Domingos Raul “Falur Rate Laek”, liu husi nia deskurus ba jornalista sira Iha Universidade Nasionál Timor Leste (UNTL) iha salaun Kaikoli, Dili, kuarta (26/08/2026).
Nia esplika, enfatiza importansia unidade nasional. Nia hateten luta libertasaun hatudu katak laiha eroi izoladu, maibe povu tomak mak reziste. “Mártir timoroan hotu, la haree ba partidu, sira hotu oan ba rai ida nee,” nia haktuir.
Nia husu atu prezerva memoria pasadu liu husi arkivu, rejistu, no liafuan moris veteranu sira nian. Nia dehan universidade iha papél importante atu estuda no hanorin patrimóniu nee molok lakon ho tempu.
Iha parte ikus, nia apela ba ator haat, Governu atu kria polítika ba interese nasional, instituisaun edukativa atu hanorin istoria ho rigor, veteranu sira atu sai ponte ba jerasaun foun, no foin sae sira atu onra sakrifísiu ho serbisu no responsabilidade.
“Patriotizmu ohin loron la sukat ho kilat, maibe ho serbisu ne’ebé halo ho diak no respeitu ba ema seluk,” nia Informa.
Seminariu nee mós halao iha kontestu selebrasaun loron Veteranus 20 Agostu no Konsulta Populár 30 Agostu ho tema jeral “Husi Luta ba Dame”.
Iha fatin hanesan Estudante UNTL Julio dos Santos esplika, Seminariu nee mos halao iha kontestu selebrasaun loron Veteranus 20 Agostu no Konsulta Populár 30 Agostu ho tema jeral “Husi Luta ba Dame” ida nee importante tebes ba Estudante sira hodi tuir Seminariu ida nee.
“Hau ohin akompana materia husi orador lubuk ida maka ohin koalia konaba istoria konsulta popular nian, neebe tema husi luta ba dame nee kapas tebes atu Loke Estudante sira nia kakuta no fuan hodi aprende diak liu tan,” nia afirma.
(jen)
