DILI, STLTIMORLESTE.com – Ministru Administrasaun Estatál (MAE), Tomás do Rosário Cabral, aprezenta planu transladasaun restus mortais Bispu nain tolu (3) ba Konsellu Ministrus (KM), Kuarta (26/08/2026).
Ministru Tomás do Rosário Cabral aprezenta planu ne’e iha reuniaun KM, ne’ebé lidera hosi Primeiru Ministru (PM), Kay Rala Xanana Gusmão, iha Palásiu Governu, Díli, ho partisipasaun membru Governu IX sira.
Tuir MAE, programa transladasaun ne’e sei organiza hamutuk hosi Governu no Konferénsia Episkopál Timorense, inklui resepsaun ofisiál ba restus mortais iha Díli iha 1 Setembru 2026, serimónia estadu iha Manatuto no misa ikus iha Tasi Tolu, Díli, iha 10 Setembru.
Programa ne’e mós inklui komemorasaun tinan daruak vizita Papa Francisco ba Timor-Leste, ne’ebé sei realiza hamutuk ho misa ikus iha Tasi Tolu.
Ministru Tomás hateten restus mortais sira sei to’o Bali, Indonézia, iha 29 Agostu, antes tama Timor Leste iha 1 Setembru. Dom Martinho da Costa Lopes no Dom Alberto Ricardo da Silva sei tama iha Tasi Tolu iha 31 Agostu.
Nia esplika katak transladasaun no serimónia haloot sei hala’o tuir programa ne’ebé komisaun servisu Governu no Igreja prepara, ho data prinsipál iha 1, 3 no 10 Setembru.
Kona-ba orsamentu, Ministru Tomás dehan Governu la prepara orsamentu espesífiku ba transladasaun no haloot, maibé sei fó apoiu liuhosi komisaun servisu ne’ebé responsabiliza ba atividade sira.
“Serimónia nee ba ita nia fiar. Tanba nee, Amu Parókia sira iha Vila Díli mobiliza sira nia sarani atu partisipa tuir ajenda ne’ebé Igreja fó sai,” afirma Ministru.
Prezidente Autoridade Munisípiu Díli (AMD), Francisco dos Santos, dehan AMD hamutuk ho xefe suku sira sei mobiliza komunidade atu partisipa iha misa iha Tasi Tolu, ne’ebé sei prezide hosi Sua Eminénsia Dom Virgílio Cardeal do Carmo da Silva, SDB.
Francisco dehan, AMD prontu atu apoia komisaun organizadora no mobiliza komunidade atu simu restus mortais Bispu nain tolu, tanba sira-nia kontribuisaun ba Timor-Leste.
“Bispu nain tolu nee sira nia kontribuisaun boot teb-tebes ba ita nia nasaun. Tanba nee, nu’udar sarani, ita hotu-hotu tenke partisipa hodi hato’o ita nia sentimentu no rekoñesimentu,” dehan Francisco.
Enkuantu, Manuel do Carmo, sarani hosi Parókia Motael, hateten nia orgullu ho esforsu Governu no Igreja atu translada no haloot restus mortais Bispu sira iha sira-nia rai moris fatin.
Nia dehan Preladu sira-ne’e iha kontribuisaun importante ba Igreja no povu Timor-Leste liuhosi servisu espirituál no pastorál sira.
(jos)
