DILI, STLTIMORLESTE.com – Prezidente Republika (PR), Jose Ramos Horta fahe vizaun futuru Timor Leste (TL) nia ho delegasaun Universidade Taylor.
Prezidente Repúblika, José Ramos Horta fahe ninia vizaun no prioridade estratéjika ba futuru Timor-Leste ho delegasaun funsionáriu no estudante sira husi Universidade Taylor, Malázia, no enkontru ne’e hala’o iha Palásiu Prezidensiál Nicolau Lobato, Dili, Kuarta (26/08/2026).
Iha enkontru ne’e, Prezidente Ramos-Horta fó énfaze ba importánsia empoderamentu feto iha área siénsia no teknolojia, no mós nesesidade atu dezenvolve programa empreendedorizmu ne’ebé forte hodi hametin baze ekonomia lokál.
Xefe Estadu mós subliña responsabilidade sívika nu’udar elementu importante iha prosesu harii nasaun. Nia enkoraja komunidade sira atu fó atensaun ba edukasaun lokál, limpeza no kuidadu ambiente.
Prezidente Ramos-Horta esplika ba delegasaun ne’e katak prioridade sira ne’e importante atu harii futuru nasaun no hasa’e kapasidade povu Timor-Leste, liuliu liuhusi edukasaun, siénsia, teknolojia no empreendedorizmu.
Hafoin enkontru, delegasaun Universidade Taylor hato’o sira-nia agradesimentu ba Prezidente no povu Timor-Leste tanba ospitalidade ne’ebé sira simu durante vizita.
Delegasaun ne’e mós hato’o apresiasaun ba vizaun dezenvolvimentu Prezidente Ramos-Horta no afirma sira-nia apoiu ba esforsu Timor-Leste nian atu kontinua hadi’a edukasaun, infraestrutura no kapitál umanu.
Enkontru entre Prezidente Ramos-Horta no delegasaun Universidade Taylor ne’e mós fó oportunidade atu fahe hanoin no koñesimentu kona-ba dezenvolvimentu nasaun no papel edukasaun iha preparasaun ba jerasaun futuru.
(eme)
