DÍLI, STLTIMORLESTE.com – Komité Revizaun Polítika (KRP) kontinua diskute prioridade no medida hamenus inefisiénsia iha alokasaun Orsamentu Jerál Estadu (OJE) 2027, iha Ministériu Finansas, Aitarak-Laran, Dili, Kuarta (26/08/2026).
Reuniaun ba dala-6 ne’e lideradu husi Primeiru Ministru (PM), Kay Rala Xanana Gusmão, ho objetivu atu haree didi’ak alokasaun orsamentu no halo poupansa iha item sira ne’ebé konsidera iha inefisiénsia.
PM Xanana hateten, diskusaun ne’e inklui orsamentu hosi munisípiu hotu, ho objetivu atu reduz alokasaun iha kategoria balun.
Nia esplika katak, preparasaun OJE 2027 hala’o ho aprosimasaun foun, ne’ebé liga planu anuál no proposta orsamentál ho prioridade nasionál, Programa Governu, Planu Estratéjiku Dezenvolvimentu (PED) 2011–2030 no limite gastu Estadu.
Reuniaun KRP ne’e kompostu hosi Vise-Primeiru-Ministru Francisco Kalbuadi Lay no Mariano Assanami Sabino, Ministra Finansas Santina José Rodrigues F. Viegas Cardoso, Ministru Obras Públikas Samuel Marçal, Ministru Planeamentu no Investimentu Estratéjiku Gastão Francisco de Sousa, Vise-Ministra Finansas Regina de Jesus, Sekretária Estadu Igualdade Elvina de Sousa Carvalho, reprezentantes Komisaun Funsaun Públika, ajénsia autónoma sira no autoridade munisipál.
Prezidente Autoridade Munisipál Manatuto, Luis Pereira, hateten prioridade munisípiu nian sei kontinua fó atensaun ba saúde públika, merenda eskolar no hametin instituisaun suku no aldeia, nu’udar preparasaun ba implementasaun poder lokal no desentralizasaun administrativu.
“Iha biban ne’e ami rekomenda atu aumenta orsamentu tanba tinan kotuk ami nia osan ba salariu no bensimentu ki’ik loos, US$1.8 millaun, maibé iha tinan 2027 ami presiza US$2.4 millaun atu aumenta forsa traballu,” dehan Luis Pereira.
Alende ne’e, Manatuto mos aprezenta proposta planu investimentu munisipál ho projetu hamutuk 34, inklui infraestrutura no Programa Nasional Dezenvolvimentu Suku (PNDS), ne’ebé implementa liuhosi transferénsia públika.
(jos)
