DILI, STLTIMORLESTE.com – Eskola Sekundária Jerál Públiku 12 de Novembro Becora indika ona Komisaun Organizadora (KO) ba Ezame Nasional tinan 2026. Preparasaun husi parte eskola nian ba ezame ne’e lao ona, inklui preparasaun foto estudante sira nian.
Haktuir Adjunto Diretór Eskola Sekundária Jerál Públiku 12 de Novembro Becora, Fernando Xavier ba STL iha nia knaar fatin, Segunda (07/09/2026) katak, eskola ne’e hahu ona preparasaun ba Ezame Nasional no semana kotuk indika ona KO.
“Husi ESG 12 de Novembro nia preparasaun kona-ba Ezame Nasional ba tinan ne’e, ami hahu tiha ona. Semana kotuk ami indika ona KO ba ezame, no foto estudante sira nian mos preparadu ona, hein atu taka iha kartaun,” nia informa.
Nia akresenta katak, agora eskola sei hein lista koletiva estudante sira ne’ebé aprova husi Ministeriu Edukasaun (ME) atu haruka mai eskola. Tuir nia, preparasaun ba Ezame Nasional husi parte eskola nian lao hanesan bai-bain.
Kona-ba númeru estudante finalista ba tinan 2026, nia hatete katak dadus ne’e seidauk bele lembra ho presiza, maibé kuaze estudante hamutuk 340 resin.
“Ami nia atividade prosesu aprendizajen husi professores ba estudante sira lao diak hanesan bai-bain. Ho nune’e, ita bele halo preparasaun ba Ezame Nasional ne’ebé diak liután ba estudante sira,” nia dehan.
Iha parte seluk, estudante Joanita Magno dehan tempu ba Ezame Nasional besik ona, tanba ne’e estudante sira tenke prepara an liuhusi estuda no partisipa ativu iha aula.
“Nu’udar estudante, tenke prepara no estuda, tanba fulan oin ami sei hahu hala’o Ezame Nasional. Loroloron mai iha eskola tuir aula, ho nune’e ita bele simu matéria husi professores. Se ita la ativu iha aula, oinsá mak ita bele hatene matéria hirak ne’e? Tanba ne’e, ita tenke ativu iha aula,” dehan nia.
Joanita dehan, profesores husi kada disiplina ativu hanorin estudante sira iha sala de aula. Maibé, dala ruma iha estudante balun falta, ne’ebé tuir nia depende ba konsiénsia husi estudante ida-idak.
Enkuantu estudante seluk, Julio da Silva, hatete prosesu ensinu-aprendizajen kada loron lao hanesan bai-bain, hodi prepara estudante sira ba Ezame Nasional. Nia hatete estudante sira ne’ebé falta aula sei lakon matéria ne’ebé professores hanorin.
“Ami nia maluk estudante sira ne’ebé falta aula, sira mak lakon matéria. Tanba Ezame Nasional besik ona, lalika falta. Kada loron hau hakarak partisipa aula to’o Ezame Nasional akontese. Se ita la prepara ita nia an agora, ita sei hasoru difikuldade iha ezame, tanba ita rasik mak lakohi prepara an atu estuda,” nia informa.
Nia hatutan katak, profesores husi kada disiplina ativu iha sala de aula, tanba ne’e estudante sira tenke ativu atu simu matéria ne’ebé hanorin. Se estudante ida moras no labele mai eskola, tenke informa ba parte eskola atu hatene no kontinua halo esforsu atu estuda hodi hasoru Ezame Nasional.
(jac)
