DILI, STLTIMORLESTE.com – Karik manorin sira la halo planu aula molok hala’o prosesu aprendizajen, bele hetan sansaun, inklui xamada atensaun no prienxe auto funsionáriu nian.
Adjuntu Diretór Eskola Sekundária Jerál Públiku 12 Novembru Becora, Fernando Xavier hatete ba STL iha nia knaar fatin, Segunda (07/09/2026) katak, sansaun ba manorin sira ne’ebé la halo planu aula la’ós regulamentu internu eskola nian, maibé tuir regra no kódigu funsaun públika, tanba manorin sira hanesan funsionáriu públiku.
“Bainhira professor sira la halo planu aula, maka sansaun mak halo chamada atensaun no prienxe auto funsionáriu nian. Ida-ne’e la’ós aplika regulamentu husi eskola nian, maibé aplika regra kódigu funsaun públika nian, tanba sira funsionáriu públiku, entaun presiza kumpri ba ida-ne’e,” dehan Fernando Xavier.
Nia hatutan katak funsionáriu públiku hotu-hotu iha obrigasaun atu kumpri regra ne’ebé estabelese ona. Se la kumpri, bele hetan auto no sansaun seluk tuir regra étika no disiplina funsionáriu públiku nian.
“Nee duni, ita-nia professores molok hala’o aprendizajen tenki prepara planu aula. Ita-nia profesores sira sempre halo planu aula, no ita nafatin halo kontrolu ba professores sira, tanba ida-ne’e importante,” dehan nia.
Iha parte seluk, profesor husi EBC Fatumeta, Feliciano Gusmao, dehan katak manorin sira tenki prepara planu aula kada loron molok hala’o prosesu aprendizajen.
“Hau hanoin, nudar manorin, kada loron ami nafatin prepara ami-nia planu aula, tanba molok aprendizajen lao, ami prepara uluk ami-nia planu aula,” nia informa.
Enkuantu Koordenador Ensinu Baziku Filial (EBF) Marinir, Aureliano Maia, dehan manorin sira iha eskola ne’e sempre prepara planu aula molok hanorin estudante sira.
“Ita-nia profesores sira, molok atu hanorin ita-nia estudante sira, sira halo uluk planu. Tanba nee, ami-nia professores sempre halo planu ida-ne’e,” tenik nia.
Iha fatin seluk, Diretór Servisu Edukasaun Munisipiu Bobonaro, Miguel Freitas, hatete katak manorin iha eskola ida-idak presiza prepara planu aula no eskola tenki halo kontrolu ba implementasaun planu ne’e.
“Ita-nia eskola ida-idak presiza halo kontrolu ba ita-nia estudantes no professores. Professores husi kada eskola presiza prepara planu aula, tanba molok hala’o aprendizajen, manorin sira presiza prepara sira-nia planu aula,” nia deklara.
(jac)
