DILI, STLTIMORLESTE.com – Eskola Sekundária Jerál Públika 5 de Maio Becora, to’o agora seidauk iha fatin biblioteka no laboratóriu ba atividade prátika estudante sira.
Informasaun ne’e hato’o husi Diretór Eskola Sekundária Jerál Públika 5 de Maio Becora, Julio Maia Castro de Jesus ba STL, Kuarta nee (09/09/2026).
Nia hatete katak, to’o agora eskola seidauk halo enkontru kona-ba Ezame Nasional, nune’e nia seidauk bele fó informasaun kona-ba preparasaun ba ezame ne’e.
“Ami seidauk hala’o enkontru kona-ba Ezame Nasional, nune’e hau labele pasa informasaun. Bainhira ami halo ona enkontru, mak hau bele pasa informasaun. Ami laiha difikuldade, buat hotu lao ho diak. Maibé konstrusaun eskola ne’e to’o agora seidauk remata hotu. Durante tinan lima ona, ami la hatene to’o ba ne’ebé prosesu ne’e. Kompanhia no Estadu mak hatene. Ami hein halo servisu deit,” nia dehan.
Nia hatete katak, ekipamentu no nesesidade seluk balun iha ona, maibé eskola seidauk iha fatin espesífiku ba laboratóriu no biblioteka.
“Laboratóriu ba klase siénsia no tékniku (CT), atu estudante sira bele halo prátika, to’o agora fatin ba biblioteka no laboratóriu seidauk iha,” nia hatutan.
Iha parte seluk, Koordenadora Pre-Eskolar Moris Foun I, Domingas Beatriz da Cunha, hatete katak, maske eskola iha ona livru, maibé seidauk iha fatin espesífiku atu rai livru sira ne’e.
Nia hatete, balun hamenus iha fatin servisu profesór sira no balun tau iha sala aprendizajen, atu bele asegura livru sira ne’e.
“Maske ami iha ona livru, maibé fatin atu rai livru ne’e mak seidauk iha. Nune’e, livru hirak ne’e balun tau deit iha profesór sira nia fatin no balun tau iha sala aprendizajen, ho nune’e bele asegura livru sira ne’e,” nia akresenta.
(jac)
