DILI, STLTIMORLESTE.com – Sekretáriu Jerál Partidu FRETILIN, Mari Alkatiri husu Prezidente Republika José Ramos-Horta no Primeiru-Ministru Kay Rala Xanana Gusmão atu halo negosiasaun ho Prezidente Republika Indonézia, Prabowo Subianto, hodi buka no hatudu restus mortais Komandante das FALINTIL, Nicolau Lobato, no sira seluk neebé mate durante konflitu iha pasadu.
Alkatiri hatoo pedidu nee ba jornalista sira iha konferénsia imprensa neebé halao iha rezidénsia nia nian, iha Farol, Díli, Sesta nee (11/09/2026).
“Hau hanoin, se mak ukun tenki husu. Desde hau nia tempu, Nicolau Lobato nia restu mortais no David Alex Daitula, mauhudu nee, hau husu hotu, inklui sira neebé mate iha 12 Novembru”, dehan Alkatiri.
Nia afirma katak, Timor-Leste no Indonézia halo ona prosesu rekonsiliasaun iha tinan hirak liubá, ho objetivu atu harii dame no hametin relasaun diak no sustentável entre nasaun rua, liuliu depois hosi konflitu no okupasaun iha pasadu.
“Hau hatene katak líder sira atuais mos husu dadauk. Agora hau husu laós hanesan problema. Hau husu tanba asuntu ida neebé ita tenki rezolve lalais, para ita nia amizade bele metin liután,” hatete nia.
Alkatiri dehan líder nasaun rua neebé atualmente ukun tenki halo esforsu tomak atu buka hatene fatin no kondisaun restus mortais sira nee, tanba komunikasaun entre Timor-Leste no Indonézia agora fasil liután liuhosi relasaun bilateral no prosesu rekonsiliasaun.
“Se laós sira neebé agora ukun, ita atu hatene loos Nicolau Lobato no sira seluk iha neebé? Aban bainrua, jerasaun hanesan ita boot sira nee mak ukun fila fali, sira mós bele dehan ami la hatene duni. Tan nee, sira neebé agora kaer ukun mak tenki hatene sira iha neebé,” afirma Alkatiri.
Líder FRETILIN nee mós husu Governu Indonézia atu fó informasaun ho transparénsia kona-ba fatin neebé suspeita restus mortais Nicolau Lobato no sira seluk haloot, nunee Governu Timor-Leste bele lori no haloot restus mortais sira nee iha fatin dignu neebé Estadu prepara ona iha Metinaro.
“Se loos ona, hatete dehan soe ba tasi, labele halo povu tomak hein ida nee. Se soe ba tasi, ita nia povu iha forma, atu bolu tuir kultura, oinsá bolu mai, hakarak mak ida nee,” Alkatiri remata.
(alb)
