MAUBISSE, STLTIMORLESTE.com – Prezidente Konsellu Imprensa (KI) husu jornalista sira hakerek feature iha instituisaun media idak idak.
Prezidente Konsellu Imprensa Antonio M. C.M. Mali hato’o kestaun ne’e liu husi diskursu bainhira ensera formasaun konaba hakerek Feature iha Posto administrativu Maubisse Munisipiu Ainaro, Sesta lokraik (11/09/2026) hato’o parabens ba jornalista nain 16 ne’ebé remata ona formasaun konaba oinsa hakerek feature, no husu labele pratika deit maibe tenke implementa iha instituisaun media idak-idak.
“Primeiru, hau hakarak hato’o parabéns ba partisipante hotu tanba imi hotu konsege remata formasaun ida-ne’e. Hau hein katak koñesimentu no kapasidade ne’ebé imi hetan laos de’it hela iha sala formasaun ida ne’e, maibé sei aplika iha imi-nia servisu loroloron nudar jornalista,” dehan Prezidente KI.
Nia dehan, Feature Story importante tebes tanba jornalizmu laos de’it hato’o informa deit maibe esplika konta istória konaba saida mak akontese, tulun públiku atu komprende tanba sá asuntu ne’e importante, oinsá asuntu ne’e afeta sira-nia moris no seluk-seluk tan.
“Reportajem feature ne’ebé di’ak bele fó moris ba ita nia istória halo buat ne’ebe imi hakerek sai moris halo ema imajina, fera kakutak no dada lori publiku kontribui hodi fo solusaun ruma) Feature Story bele aprezenta ba públiku ema ruma nia situasaun riil, sira-nia esperiénsia, difikuldade, susesu no emosaun. Ba televizaun, narrativa ne’ebe kombina ho imajen ne’ebé forte tulun públiku komprende asuntu ruma ho fasil liu. Ba rádio, liafuan jornalista nian, ema (fontes) sira-nia lian, entrevista no son bele kria imajen iha ouvinti nia imajinasaun,” dehan Antonio.
Nia akrezenta tan katak importante tebes jornalista konsiente katak, feature story ne’ebe hakerek ho diak, sei satisfás di’ak ba lee-nain sira, rona-na’in sira no haree-na’in sira, tanba nia la’os informasaun baibain deit maibe informasaun ho ninia kontekstu, komprensaun no ligasaun umana.
Feature story bele halo asuntu ne’ebé komplikadu sai fasil liu atu komprende no bele enkoraja públiku atu hanoin refleta kle’an liu kona-ba sira-nia sosiedade.
“Nudar jornalista, imi iha responsabilidade importante. Imi-nia reportajem tenke loos, akurat no bazeia ba faktu, maibé tenke mos klaru, interessante, balansu no relevante ba públiku. Tanba ne’e, hau enkoraja imi hotu atu kontinua pratika kapasidade ida-ne’e. Kuandu imi sai di’ak liu iha konta istória, imi sei sai di’ak liu mos iha servi públiku,” katak nia.
Nune’e mos Formador Firmansyah Syamsi husi Indonezia hatutan materi ne’ebé mak nia lori hodi fahe jornalista sira mak konaba Feature Writing no feature ne’e maneira hakerek jornalístika ne’ebé laos foka de’it ba faktu prinsipal, maibé buka mos istória, ema nia esperiénsia, ambiente no elementu human interest.
Objetivu mak halo leitor komprende no sente istória ne’ebé konta, maibé nafatin bazeia ba faktu loos no ética jornalístika.
“Durante loron lima nia laran hau ho formador Rane fahe esperensia konaba oinsa hakerek Feature iha radio no Televizaun tuir ami hakerek feature ne’e importante los ba jornalista iha Timor Leste oinsa hakerek ho maneira oinsa atrai ema rona no hare’e,” katak nia.
Nia husu materia neebe fahe ona jornalista idak idak bele implementa iha sira nia instituisaun ida idak iha Radio no Televizaun.
Nune’e mos Jestora husi Radio Komunidade Maliana Joaquina Seijas hatete nia esperansa ba formasaun ida ne’e katak aprende buat barak husi formador nain rua husi Indonezia hanorin oinsa hakerek feature ne’ebé diak no los, espera katak buat ne’ebe aprende sei implementa iha radio komunidade Maliana.
“Tanba babain hau hanoin feature ne’e hakerek naruk maibe liu husi formasaun ida ne’e hau aprende katak feature bele hakerek minutu 4 too 7 se naruk liu too 10 menit, nomos hau aprende buat barak iha ne’e,” katak nia.
Nune’e mos jornalista husi Radio Komunidade Bokouli, Jenoveva Andre da Silva hato’o agradese ba Konsellu Imprensa tanba bele fasilita ona formasaun ba jornalista sira konaba hakerek feature.
“Hau fiar katak durante semana ida ne’e hau lafoti buat barak husi formasaun ne’e maibé hau sei foti buat balun ne’ebé relevante ho komunidade sira publika iha ami nia radio tuir materia ne’ebé durante ne’e hau hetan iha formasaun durante semana ida iha Maubisse,” katak nia.
Jornalista nain 16 komposto husi Jornalista husi Suara Timor Lorosa’e STL, RTTL, Radio Liberdade, Radio komunidade husi Nasional no Munisipiu sira, TVE, Radio Loriko no seluk tan.
(eme)
