DILI, STLTIMORLESTE.com – Komando Polísia Nasional Timor-Leste (PNTL) hamutuk ho Falintil -Forsa Defeza Timor-Leste (F-FDTL ) susesu garante fo seguransa durante serimónia iha Igreja Parokia Katedrál Imaculada da Conceição.
Tuir Komandante Polísia Nasional Timor Leste (PNTL) Munisipiu Díli, Komisariu Asistente Polísia Orlando Gomes hatete durante Serimónia nee ho prezensa autoridade Estadu, lideransa Igreja, família Preladu sira no komunidade atu fó omenajen ikus.
Nia dehan PNTL foku ba kontrolu movimentu, seguransa partisipante, ordem públika no tráfiku.
“Ita Kordenasaun ho F-FDTL no KPK permite ami responde lalais ba situasaun iha terrenu no durante Serimónia nee Ita susesu garante Seguransa nee lao ho diak too remata,”hatete Komandante Polísia Nasional Timor Leste (PNTL) Munisipiu Díli, Komisariu Asistente Polísia Orlando Gomes ba STL liu husi telefone, Sabadu (12/09/2026).
Nia informa, durante atividade, situasaun jeralmente kalmu. Programa hotu la’o tuir planu ho respeitu ba natureza solene no relijioza.
Komandante PNTL no F-FDTL nafatin monitoriza no orienta membru sira. Sira husu atu servisu ho profisionalizmu, disiplina no responsabilidade.
Partisipasaun KPK mós importante. Sira ajuda komunika ho komunidade hodi apoia manutensaun seguransa no ordem.
“Hau hatete katak, susesu ne’e hatudu katak kolaborasaun entre PNTL, F-FDTL, KPK no komunidade presiza tebes ba atividade públika no relijioza,”nia koalia.
Nia esplika ,PNTL sei kontinua hametin servisu polisiamentu no kooperasaun hodi garante seguransa no tranquilidade ba povu Timor-Leste.
Iha fatin katak, Maria Banca dos Santos nudar sarani Katolika nee Informa, segurasa iha serimónia haloot restus mortais Preladu Katólika na’in haat, iha Igreja Parokia Katedrál Imaculada da Conceição, Dili nee Lao diak tebes.
“Iha momentu nee iha haree serimonia Haloot restu mortais Preladu Katólika na’in haat lao diak tebes,tanba hetan segurasa masimu husi PNTL ho F-FDTL,tanba nee parabens ba Instituisaun Rua neebe esforsu hodi fo segurasa ba sarani hotu-hotu,”nia afirma.
(jen)
