DILI, STLTIMORLESTE.com – Ministériu Komérsiu no Indústria (MCI) lansa Timor Shop, plataforma komérsiu eletróniku atu promove, fa’an no fasilita asesu produtu lokal ba konsumedor iha Timor-Leste.
MCI lansa aplikasaun komérsiu eletróniku Timor Shop, hamutuk ho promosaun produtu lokal sira hanesan Moffu, Marungi Uut no Green T Mor.
Ministru Komérsiu no Indústria, Nino Pereira hatete, Timor Shop sai hanesan plataforma atu promove no halo marketing ba produtu lokal, inklui produtu Marungi ne’ebé dezenvolve husi Kompania Mina Marungi Tradisional (M2T).
Nia hatete, plataforma ne’e fó oportunidade ba produtor lokal atu promove sira nia produtu no asesu merkadu ho maneira dijital.
“Ida ne’e meiu ida ne’ebé presiza duni dudu ba oin. IX Governu Konstitusional liuhusi MCI hakarak promove produtu lokal no komersializa produtu sira sai hanesan produtu ne’ebé ita bele orgulhu ba,” dehan Nino ba Jornalista iha Salaun Piso 3 MCI, Fomentu, Segunda (14/09/2016).
Tuir Nino, produtu Marungi ne’ebé uluk iha forma simples, liuhusi inovasaun M2T transforma ona sai produtu oin-13. Situasaun ne’e hatudu potensial rekursu lokal atu sai produtu ho valor ekonomiku.
Nia mos hatete, transformasaun dijital sai parte importante husi dezenvolvimentu ekonomia. Timor-Leste presiza aproveita plataforma dijital atu promove produtu lokal no aumenta asesu produtor sira ba merkadu.
Nino hatete, Governu sei kontinua halo esforsu liuhusi politika no regulamentu atu suporta produtu lokal, nune’e konsumedor iha rai laran bele iha konfiansa no orgulhu atu konsumu produtu lokal.
Kona-ba kualidade, Nino hatete, Institutu Kualidade Timor-Leste (IQTL) fó ona sertifikasaun ba balun produtu ai-han no bebida ne’ebé tama iha merkadu.
Nia subliña, nesesidade atu dezenvolve kapasidade laboratóriu nasional hodi garante seguransa, ijiene no kualidade produtu antes sirkula iha merkadu nasional no internasionál.
Governu mos sei kontinua promove produtor lokal liuhusi ezpozisaun no atividade promosaun seluk, hodi estimula kreatividade no inovasaun, no aumenta kapasidade produtu lokal atu kompete iha merkadu.
Enkuantu ne’e, CEO Kompania Mina Marungi Tradisional (M2T), Cristiano dos Santos, hatete Timor Shop la’ós deit kona-ba fa’an produtu, maibé mos atu promove produtu lokal, kultura, koñesimentu tradisional, moris saudavel, inovasaun no ekonomia Timor-Leste.
Cristiano hatete, Timor-Leste iha patrimóniu natural no koñesimentu tradisional ne’ebé komunidade sira uza durante jerasaun barak, liuliu kona-ba ai-horis no maneira moris saudavel.
“Koñesimentu ida ne’e parte husi ita nia identidade. Agora ita iha oportunidade atu lori koñesimentu no rekursu lokal ida ne’e ba nivel foun. La’ós atu abandona tradisaun, maibé atu dezenvolve ho responsabilidade, kualidade no inovasaun,” dehan nia.
Nia hatete, kombinasaun entre koñesimentu tradisional, siénsia, kualidade, inovasaun no merkadu dijital bele kria oportunidade foun ba produtu lokal.
Cristiano mos subliña, M2T la halo alegasaun katak produtu herbal sira bele substitui tratamentu médiku, maibé promove moris saudavel no uza rekursu natural ho responsabilidade.
“Ita la deklara katak produtu herbal ida bele substitui tratamentu médiku, no ita la halo promesa médika ne’ebé la iha baze. Ita kontinua buka evidénsia, hadi’a kualidade no respeita regulamentasaun,” dehan nia.
Tuir Cristiano, garantia kualidade, seguransa, evidénsia no regulamentasaun importante atu produtu lokal hetan konfiansa iha merkadu nasional no internasionál.
Nia hatete Moffu, Marungi Uut, Green T Mor no produtu seluk M2T nian sai parte husi esforsu atu valoriza rekursu no produtu lokal Timor-Leste.
Ho Timor Shop, M2T hakarak kria ponte entre produtor lokal no konsumedor, tanba teknolojia dijital bele fasilita asesu ba merkadu no kria oportunidade ba negósiu mikro, ki’ik no médiu.
Enkuantu ne’e, Development Aplikasaun Timor Shop, Marcelino de Andrade, hatete Timor Shop mak plataforma komérsiu eletróniku lokal ne’ebé konekta vendedor no konsumedor iha Timor-Leste liuhusi teknolojia dijital.
Nia hatete, plataforma ne’e sei fasilita vendedor promove no fahe sira nia produtu, enkuantu konsumedor bele buka no sosa produtu lokal ho maneira fasil liu.
Marcelino hatete, Timor Shop buka responde ba limitasaun asesu ba merkadu online lokal, prezensa dijital vendedor ne’ebé seidauk forte no nesesidade konsumedor atu hetan maneira simples atu sosa produtu liuhusi plataforma dijital.
Tuir nia, Timor Shop sei dezenvolve ekosistema komérsiu dijital lokal ne’ebé liga vendedor, plataforma no konsumedor, hodi suporta transformasaun ekonomia dijital iha Timor-Leste.
(dom)
