AMBENO, STLTIMORLESTE.com – Komisaun Anti Korupsaun (KAK) husu ba Autoridade Rejiaun Administrativa Espesial Oecusse-Ambeno (RAEOA) atu hapara kompanhia rua (2) abandona projetu iha Oecusse no ba oin sei la fo tan projetu, tanba kompanhia la iha responsabilidade.
Informasaun nee hatoo husi Diretor Rejional Serbisu Obras Publiku, RAEOA, Remigio Nuno Sila ba STL iha ninia knaar fatin Santa Rosa Oecusse, Segunda (14/09/2026).
“Ita hetan Surat ida husi KAK, fo ona ba Autoridade RAEOA katak, projetu sira neebe abandonadu husi Kompanhia rua nee, ita sei hapara kontratu. Ita hapara kontratu la signifika ita la kontinua obra sira nee, maibe ita sei kontinua nafatin projetu sira nee husi kontratu kompanhia seluk hodi kontinua obra sira nee. Kompanhia neebe abandona projetu Konstrusaun Eskola Bazika Filial Kinat Suku Monemeko, Husi Kompanhia Tafen Kuan nee kompanhia lokal ida husi Oecusse iha Postu administrativu Pantemakasar no projetu estrada neebe abandona husi Kompaanhia CP, nuudar kompanhia nasional, neebe kaer obra estrada iha postu Administrativu Pasabe, iha Suku Malelat Postu Administrativu Pasabe ba Kusi, Suku Lelaufe, Postu Administrativu Nitibe, Rejiaun Administrativa Espesial Oecusse-Ambeno,” dehan Diretor Rejional Serbisu Obra Publiku RAEOA, Remigio Nuno Sila.
“Ita simu ona dokumentus rua husi KAK atu devolve fali dokumentus ba kompanhia tanba abandona projetu no kompanhia rua nee la kumpri orariu orientasaun serbisu tuir data kontratu, tanba nee KAK rekomenda ba Autoridade RAEOA atu hapara kontratu, nunee submete ba aprovizionamentu hodi loke fali tenderizasaun foun nunee, kontinua obra nee husi kompanhia seluk, liu-liu konstrusaun eskola Kinat no estrada husi Malelat tun ba Kusi Suku Lelaufe ba Suku Ban Afi. Projetu nee sira abandona tempu naruk ona, ita fo ona tempu ba sira no fo samada atensaun ba sira, maibe too fin husi kompanhia la iha responsabilidade, atu kontinua obra hirak nee,” afirma Remigio.
Dadaun nee husi Ekipa Obras Publiku hahu halo identifikasaun ba obra sira nee, liu-liu aitem serbisu balun neebe kompanhia sira neebe abandona ona projeitu nee no sedauk halo atu tama kotasaun no tenderizasaun foun ba kompanhia seluk atu finaliza obra hirak nee.
Iha fatin ketak, Jestor Postu Administrativu Pasabe, Paulino Marques dehan, sente triste ho obra estrada neebe abandona husi kompanhia, tuir loos estrada nee bele liga ona Suku Malelat ba Kusi Suku Lelaufe ho Ban Afi maibe obra nee sedauk bele kontinua too ohin loron, tanba nee husu nafatin ba Autoridade RAEOA atu kontinua obra nee tanba besik atu hasoru estrada Suku Malelat, maibe la hatene kestaun saida maka obra nee abandona kuaze tinan hirak ona,” afirma nia.
“Ami nuudar Jestor Postu Administrativu Pasabe, husu nafatin ba governu Autoridade atu kontinua obra estrada Husu Kusi ba Malelat, tanba kuandu estrada nee diak, sei hakbesik povu atu asesu ba merkadu kapital Oecusse husi Suku Ban Afi, lalais duke liu fali husi Suku Abani maka tun fali ba Nibin iha Postu Administrativu Oesilo foin maka tun ba Oecusse vila, nee kleur tebes,” dehan nia.
Antes nee, Provedoria Direitus Humanus no Justisa (PDHJ), Virgilio da Silva Guterres ho ekipa investigasaun tun direitamente hodi haree obra konstrusaun EBF Kinat neebe lokaliza iha Suku Monemeko, identifika no haree rasik ho matan, katak kompanhia abandona projetu nee kuaze tinan barak ona.
“Hau mai iha iha Aldeia Kinat hodi haree konstrusaun EBF Kinat neebe maka abandona husi kompanhia Tafen Kuan, prosesu investigasaun sei kontinua lao atu nunee osan estadu neebe finansia obra ida nee, kompanhia labele abandona, tanba governu konstrui obra nee ba labarik sira nia futuru, sei obra nee abandona, signifika ita impede labarik sira nia futuru,” dehan nia.
Nia dehan, dadaun mai haree rasik ho matan no sei halo investigasaun nunee kompanhia toma responsabilidade ba obra nee.
(jos)
