AMBENO, STLTIMORLESTE.com — Inspetora Jerál AIFAESA, Dra. Odete da Silva Viegas, ho ekipa hasoru PA-RAEOA atu husu fatin ba konstrusaun eskritóriu permanente AIFAESA iha Oecusse.
Inspetora Jerál Autoridade Inspeksaun no Fiskalizasaun Atividade Ekonomia, Sanitária no Alimentar (AIFAESA), Dra. Odete da Silva Viegas, hamutuk ho ekipa, halo vizita servisu ba Oecusse no hasoru Prezidente Autoridade Rejiaun Administrativa Espesial Oecusse-Ambeno (PA-RAEOA), Régio da Cruz Salu, Tersa nee (15/09/2026).
Enkontru ne’e nia objetivu prinsipál mak husu apoiu Autoridade RAEOA atu disponibiliza fatin ba AIFAESA hodi harii eskritóriu permanente iha Oecusse.
PA-RAEOA, Régio da Cruz Salu, hato’o boas-vindas ba Inspetora Jerál AIFAESA no ekipa iha salaun Gabinete Autoridade RAEOA, iha oras 09h00 dader.
“Hau lori naran Autoridade RAEOA hato’o boas-vindas ba Inspetora Jerál AIFAESA, Dra. Odete da Silva Viegas, ho ekipa ne’ebé mai Oecusse,” dehan Régio.
AIFAESA presiza eskritóriu permanente
Iha enkontru ne’e, Inspetora Jerál AIFAESA, Odete da Silva Viegas, hato’o agradese ba PA-RAEOA no diretór rejionál sira tanba simu ekipa AIFAESA iha Oecusse.
Odete dehan objetivu prinsipál vizita mak husu fatin atu harii eskritóriu permanente, tanba funsionáriu AIFAESA ne’ebé destakadu iha RAEOA presiza fatin apropriadu hodi hala’o servisu.
“Ohin ha’u ho ekipa mai hasoru Prezidente Autoridade RAEOA. Asuntu prinsipál mak atu husu fatin hodi harii eskritóriu AIFAESA permanente iha Oecusse, tanba funsionáriu AIFAESA ne’ebé destakadu iha RAEOA presiza eskritóriu atu hala’o servisu,” dehan Odete.
Nia mos hato’o agradese ba PA-RAEOA, Diretor Rejional Terras, Propriedade no Servisu Kadastru Oecusse, Jose Ase Neno, Diretora Rejional Servisu Saúde, Odete Amado Martins, no ekipa Autoridade RAEOA tanba disponibiliza rai ba AIFAESA.
Odete dehan, ho iha eskritóriu permanente, AIFAESA bele hametin kooperasaun ho Autoridade RAEOA, liuliu iha monitorizasaun no fiskalizasaun atividade ekonomia iha Oecusse.
(jos)
