DILI, STLTIMORLESTE.com – Droga hamutuk 98 grama hanesan sabu-sabu no extasi ne’ebe sidadaun Indonézia ida tenta lori tama teritoriu Timor-Leste, konsidera ameasa boot ba seguransa nasional, hafoin Polisia Sientifika Investigasaun Kriminal (PSIK) ho Servisu Nasional Intelijensia (SNI) konsege detein iha area fronteira.
Akademista Universidade Nasional Timor Lorosa’e (UNTL), Jose Xavier ba STL, Tersa (15/09/2026), apresia servisu PCIC ho SNI nian, no dehan montante ne’e hatudu rede droga internasional komesa halo Timor-Leste hanesan sira nia alvu ba atividade ilisitu.
“Ha’u apresia servisu PSIK ho SNI nian ne’ebe konsege detein sidadaun Indonesia lori droga 98 grama tama mai Timor. Maibe ida ne’e hatudu katak rede droga internasional komesa tau matan ona ba Timor-Leste hanesan merkadu foun,” Jose Xavier hatete.
Nia dehan, montante 98 grama sabu-sabu no extasi ne’e laos kuantidade kiik, maibe boot no bele estraga jerasaun joven barak.
Tuir nia, Timor-Leste nu’udar nasaun kiik ho fronteira terrestre ne’ebe naruk ho Indonesia, fasil tebes ba trafikante sira atu tama-sai liu dalan ilisitu.
“PSIK no SNI presiza haforsa intelijensia iha fronteira, laos deit iha Batugade ka Salele, maibe iha dalan klaandestinu sira. Tenke iha kooperasaun intelijensia metin ho Indonesia,” nia hatutan.
Nia husu mos ba Governu atu aumenta fasilidade laboratorium teste droga iha PSIK no kapasita rekursu umanu SNI hodi kombate kriminalidade organizadu transnasional.
Iha parte ketak, Observador Politika, Antonio Magno hatete kazu droga 98 grama ne’e laos deit krime komum, maibe ameasa ba estabilidade nasional no presiza medida urjente husi Governu.
“Droga ne’e problema transnasional, se Governu la tau atensaun seriu, Timor bele sai tranzitu ba droga. PSIK ho SNI halo ona serbisu di’ak, maibe Parlamentu Nasional no Governu tenke aprova lei anti-droga ne’ebe forte liu,” Antonio Magno hatete.
Entretantu Autoridade Timor-Leste nian, kompostu husi Polísia Sientífika Investigasaun Kriminál (PSIK) ho Servisu Nasionál Intelijénsia (SNI) kaptura no detén sidadaun Indonézia (WNI/warga negara Indonesia) ida ho inisiál WJ ne’ebé suspeita lori droga ho tipu sabu-sabu no ekstasi hamutuk grama 98,0162 tama teritóriu nasionál Timor-Leste.
(car)
