DILI, STLTIMORLESTE.com – Deputadu Bankada FRETILIN, Antoninho Doutel Sarmento hatete, moris presiza fleksibilidade hodi fo funan buras, tan ne’e husu ba família hotu atu moris ho domin no fo espasu diak ba malu nu’udar jardin ne’ebé furak.
Komentariu ne’e hato’o ba STL, iha Díli, Tersa (15/09/2026), relasiona ho filosofia moris nian.
“Moris ho flexibilidade, hadia, fo aihan nutritivu, harahun rai ne’ebé tos, rega ho bee suficiente hodi fo espaço di’ak ba aifunan ninia abut sira, atu nia bele fo moris, no fo funan buras nudar jardin ba família, no ba oratório credo nian,” Antoninho Doutel Sarmento hatete.
Nia esplika, rai diak katak laran ne’ebe nakonu ho diálogo, perdaun no entendimentu, laos odiu. Bee sufisiente katak fiar, no orasaun loron-loron nudar aihan klamar nian ne’ebé halo moris ita nia isin, hodi nafatin iha folin ba Marómak, rai, no maluk sira.
“Se família iha fleksibilidade hodi rona malu, hatene hadia malu bainhira sala, no fo aihan nutritivo ho domin no respeitu, família ne’e sei buras,” dehan Deputadu nee.
Tuir nia, família ne’ebé buras sei sai jardin furak, fo ksolok ba oan sira, no sai fatin ba formasaun carácter, edukasaun, ho base ba orasaun, fiar, no esperansa husi oratório kredo família nian rasik.
Iha parte ketak, Observador Sosial, Manuel da Costa apresia filozofia ne’e no konsidera hanesan liafuan motivasaun ne’ebe relevante ba kondisaun familia Timor-oan ohin loron.
“Ha’u haree katak filozofia jardin ne’e importante tebes ba sosiedade Timor-Leste ohin loron. Familia barak mak sei moris iha rai tos, nakonu ho problema no la iha dialogo,” Manuel da Costa hatete .
Entretantu husi pontu de vista sosial, filozofia kona-ba fleksibilidade no harahun rai tos ne’e hatudu katak moris familia nian laos deit presiza hahán isin nian, maibe presiza mos hahán klamar nian.
Bainhira familia ida moris ho fiar no perdua, nia sei fo funan buras ne’ebe laos deit furak ba uma laran, maibe sai inspirasaun ba vizinu no ba sosiedade tomak.
Ho nunee funan buras nee mosu laos deit furak na uma laran, maibe sai inspirasaun no jardim furak ba vizinu no ba sosiadade tomak.
(car)
