BAUCAU, STLTIMORLESTE.com – Servisu Munisipál Edukasaun Baucau la aseita kona-ba implementasaun Programa Merenda Eskolar iha Eskola Ensinu Baziku Filial (EBF) Uaitame, ne’ebé estudante na’in rua (2) benefisia ba manu tolun fuan ida.
Alegasaun ne’e mosu tanba estudante sira ne’ebé benefisia programa merenda eskolar iha EBF Uaitame, estudante na’in rua fahe manu tolun fuan ida iha loron 15 Setembru ne’e.
Diretór Servisu Munisipál Edukasaun Baucau, Afonso dos Santos da Costa hatete katak, informasaun kona-ba estudante na’in rua benefisia ba manu tolun fuan ida presiza verifikasaun, tanba implementasaun Programa Merenda Eskolar tenke tuir medida no prosedimentu ne’ebé determina.
“Ha’u foin mak rona informasaun nee, mais tuir menu labele, maibe estudante ida nia iha direitu ba manu tolun ida, karik ai-fuan hudi mós ida, ne’e labarik nia direitu labele fahe,” hateten Afonso ba STL iha Vila Nova Baucau, Kuarta (16/09/2026)
Autoridade Edukasaun Baucau mos sei halo verifikasaun ba mekanismu distribuisaun ai-han iha eskola refere, inklui kuantidade ai-han ne’ebé fornese ba estudante sira.
Programa Merenda Eskolar implementa ho objetivu atu apoia estudante sira durante prosesu aprendizajen, no garante katak benefísiu merenda ba estudante tuir padraun ne’ebé estabelese.
“Iha Uaitame ne’e ami sei komfirma, tanba saída no oinsá mak fó de’it manu tolu fahe ba estudante na’in rua, ita ba tereñu mak hetan informasaun,” Afonso komenta
Diretór Munisípal nee katak, ekipa Servisu Munisípal ne’ebé responsabiliza ba implementasaun programa merenda eskolar sei ba tereñu halo halo identifikasaun ba programa refere.
“Ita ba tereñu mak hare’e manu tolun barak mak na’in rua fahe ba malu ne’e sala, entaun ita fó hanoin para labele halo tán no fó sansaun,” katak Afonso
(tom)
