DILI, STLTIMORLESTE.com — Tribunal Judisiál Primeira Instánsia Dili (TJPID) liuhusi despaisu ikus ba prosesu primeiru interrogatóriu, deside aplika medida koasaun ha’at ba arguidu nain hitu (7) ne’ebé autoridade seguransa detein iha Otel Garden Beach.
Ministériu Públiku, ne’ebé reprezenta husi Prokuradór Domingos Gouveia Leite, lori arguidu sira ba tribunal no akuzasaun ho krime jogu ilísitu, previstu iha Artigu 322; asosiasaun kriminoza, previstu iha Artigu 188; brankamentu kapitál, previstu iha Artigu 313; no burla informátika, previstu iha Artigu 268, tuir Kódigu Penál Timor-Leste.
Depois rona deklarasaun husi arguidu sira, tribunal foti desizaun atu aplika medida koasaun ha’at.
“Tribunal deside aplika medida ha’at ba arguidu sira,” dehan fonte judisiál ida iha Tribunal Dili, Kuarta (16/09/2026).
Medida sira ne’ebé Tribunal aplika ba arguidu nain hitu mak: kontinua mantein Termu Identidade no Rezidénsia (TIR) ne’ebé antes iha ona; Apresentasaun Periódika, atu arguidu sira aprezenta-an iha fatin ne’ebé Tribunal determina durante prosesu investigasaun; Proibisaun ba Ausénsia, inklui sita sira-nia pasaporte atu labele sai husi territóriu Timor-Leste; no Koasaun, hanesan garantia finanseira ba Tribunal.
Se arguidu sira halai ka ses husi prosesu justisa, osan koasaun bele afavor ba Estadu.
Ba arguidu nain ha’at, Tribunal determina koasaun kada ema US$3,000, enkuantu ba arguidu nain tolu seluk, kada ema tenke selu koasaun US$ 5,000.
Iha alegasaun antes desizaun tribunal, Prokuradór Turnu Domingos Gouveia Leite husu atu aplika medida prizaun preventiva ba arguidu nain hitu.
Enkuantu parte defeza husu Tribunal atu liberta arguidu sira, tanba konsidera katak detensaun ne’ebé autoridade halo la tuir regra ne’ebé iha.
Rekorda katak, autoridade seguransa detein arguidu nain hitu iha loron 10 Setembru 2026, bainhira sira hala’o atividade online.
Prosesu ne’e prezide husi Juíza Novela, ho Ministériu Públiku reprezenta husi Prokuradór Domingos Barreto. Arguidu nain hitu hetan asisténsia legál husi advogadu privadu nain rua, Octávio Cardoso no Pedro Camões.
(ter)
