BAUCAU, STLTIMORLESTE.com – Servisu Munisípal Edukasaun Baucau husu eskola no profesór sira atu aumenta aula reforsu, hodi asegura preparasaun estudante sira antes ezame nasionál ne’ebé sei hahú iha 19 Outubru 2026.
Diretór Servisu Munisípal Edukasaun Baucau, Afonso dos Santos da Costa, hateten, pedidu ne’e importante tanba estudante sira sei hasoru ezame nasionál iha tempu besik, ne’ebé sei uza atu sukat sira nia kapasidade aprendizajen.
Tuir nia, Servisu Munisípal Edukasaun Baucau prepara ona sentru ezame 60 resin atu simu estudante sira ne’ebé sei tuir ezame nasionál iha Munisípiu Baucau.
“Entaun ita husu profesór sira aumenta aula reforsu para estudante sira prepara diak liután, partisipa iha ezame nasionál ne’e ho diak,” hateten Afonso ba STL iha Vila Nova, Baucau, Kinta (17/09/2026).
Afonso hateten, ezame nasionál la’ós de’it atu haree estudante nia rezultadu, maibé mós sai instrumentu importante atu avalia estudante nia kapasidade durante prosesu aprendizajen no haree kapasidade profesór sira bazeia ba rezultadu estudante nian.
“Sentidu husi ezame nasionál mak avaliasaun ida ne’ebé aas liu atu haree estudante nia kapasidade durante prosesu aprendizajen nia laran, nomós haree profesór sira nia kapasidade to’o iha ne’ebé ita haree liuhusi rezultadu,” nia hateten.
Nia esplika, rezultadu ezame nasionál bele sai baze atu identifika problema kapasidade estudante no métodu hanorin profesór sira nian, inklui atu haree mós papel inan-aman nia akompañamentu ba oan sira eskola.
Tanba ne’e, Servisu Munisípal Edukasaun Baucau mós husu inan-aman sira atu fó atensaun liután ba preparasaun oan sira nian, liuliu hodi limita tempu halimar no aumenta tempu estuda.
“Mensajen ba komponente hotu-hotu ne’ebé kolabora ba estudante sira nia preparasaun ne’e mak inan-aman atu limita oan sira nia tempu halimar no fó tempu ba sira prepara an, hakbesik profesór sira no haree matéria sira ba ezame nasionál ne’ebé sei mai,” nia hateten.
(tom)
