DILI, STLTIMORLESTE.com – Maske Governu aloka orsamentu boot millaun ba millaun ba programa merenda eskolár, maibe implementasaun iha terrenu seidauk efikas, hanesan akontese iha EBF Uaitame, Baucau, ne’ebe estudante na’in rua tenke fahe manu tolun fuan ida deit.
Kondisaun nee viral iha media sosial no sai preokupasaun publiku nian foin lalais nee.
Akademista Universidade Nasional Timor Lorosa’e (UNTL), Silvino Soares hatete, kondisaun iha EBF Uaitame nee hatudu katak programa merenda eskolár seidauk la’o ho diak no la sufisiente ba estudante sira iha area remotas.
“Ha’u triste haree imajen estudante na’in rua fahe manu tolun fuan ida iha EBF Uaitame, Baucau. Ida nee hatudu katak ita nia atensaun ba nutrisaun labarik sira nian seidauk maksimu,” Silvino Soares dehan ba STL, iha Dili, Kinta (17/09/2026).
Tuir nia, merenda eskolár iha papel importante atu hasae estudante sira nia konsentrasaun no saude iha eskola, maibe kuandu fahe la hanesan no menus, sei fo impaktu negativu ba sira nia aprendizajen.
“Labarik sira ba eskola atu aprende, laos atu hamlaha. Se manu tolun fuan ida tenke fahe ba na’in rua, oinsa sira bele hetan nutrisaun ne’ebe sufisiente,” nia kestiona.
Nia husu ba Ministeriu Edukasaun no parseiru relevante sira atu halo avaliasaun urjente, no intervensaun lalais ba programa merenda eskolár iha Uaitame no eskola filial sira seluk.
Iha parte seluk, Observador Ekonomia, Manuel da Silva konsidera kazu EBF Uaitame nee, hanesan lezasaun boot ba dezenvolvimentu kapital umanu Timor-Leste nian iha futuru.
“Kestaun merenda eskolár nee kestaun ekonomia mos. Kuandu labarik nutrisaun la diak, aban sira nia produtividade sei menus. Orsamentu millaun ba millaun ita aprova, maibe realidade iha terrenu labarik fahe manu tolun,” Manuel da Silva esplika.
Tuir nia, Governu tenke harii sistema monitorizasaun ne’ebe rigorozu no transparante husi nasional to’o eskola filial sira, husi prosesu tender to’o distribuisaun, atu evita iregularidade no asegura labarik sira hetan nutrisaun sufisiente.
Entretantu, imajen labarik na’in rua fahe manu tolun ida nee viral makaas iha media sosial Facebook no seluk tan, hodi hamosu komentariu oioin husi publiku ne’ebe preokupa no husu Governu atu tau atensaun seriu ba merenda eskolár iha area remotas.
(car)
