DILI, STLTIMORLESTE.com – Folin sasan konstrusaun iha merkadu kontinua sa’e maka’as, la’os deit mina, maibe semente, besi no kalen mos folin sa’e, hodi fo susar ba komunidade ne’ebe hakarak harii uma.
Tuir informasaun ne’ebe jornalista STL rekolla, komunidade balun reklama tanba folin material harii uma sa’e makaas iha semana hirak ikus ne’e, ne’ebe difikulta sira atu kontinua harii uma no halo konstrusaun kiik sira.
Iha merkadu Dili, folin semente, besi, kalen no material konstrusaun seluk sa’e kompara ho fulan kotuk, ne’ebe fo impaktu ba atividade konstrusaun.
Kona-ba kestaun ne’e, Observador Ekonomia, Manuel da Silva, hatete laos presu mina deit mak aumenta, maibe kuaze sasan konstrusaun hotu folin sa’e iha merkadu no presiza intervensaun Governu nian.
“Laos presu mina deit mak aumenta maibé kuaze sasan konstrusaun mos presu aumenta iha merkadu,” Manuel da Silva hatete ba STL, iha Dili, Kinta (17/09/2026).
Tuir nia, kondisaun ne’e bele fo impaktu boot ba dezenvolvimentu nasional, tanba projetu konstrusaun barak bele paradu no komunidade labele harii uma ho folin ne’ebe karun.
“Kondisaun ne’e bele fo impaktu ba dezenvolvimentu no presiza atensaun husi Governu atu halo kontrolu ba folin iha merkadu, se lae dezenvolvimentu sei paradu,” nia hatutan.
Nune’e mos nia husu ba Ministeriu Komersiu Industria no AIFAESA, atu tun halo fiskalizasaun ba merkadu no garante folin sasan konstrusaun la sa’e arbiru hodi proteje povu kiik sira.
Iha parte seluk, komunidade Daniel de Oliveira preokupa ho folin sasan konstrusaun ne’ebe sa’e makaas.
“Ami hakarak harii uma maibe sasan konstrusaun folin sa’e los, ami labele sosa,” Daniel de Oliveira hatete.
Nia hatutan, uluk sira bele sosa semente no besi ho folin normal, maibe agora folin sa’e dala rua no difisil atu hetan osan hodi kontinua harii uma ne’ebe seidauk remata.
“Governu tenke haree lalais kestaun ne’e, tanba se folin kontinua sa’e, ami komunidade kiik sei labele harii uma,” nia husu.
Entretantu, Marcelino da Silva, ne’ebe servisu iha loja konstrusaun balu iha area Hudi-Laran hatete, presu material konstrusaun liu-liu semente sa’e tanba menus stok iha armajen.
Nia esplika, kustu importasaun no transporte husi rai liur mos sa’e makaas, entaun loja tenke hasae folin hodi la hetan lakon.
“Ami mos difisil, tanba kliente menus mai sosa tanba folin karun, maibe ami tenke faan tuir presu merkadu nian,” Marcelino dehan.
(car)
