DILI, STLTIMORLESTE.com – Servisu Edukasaun Munisípiu Bobonaro simu ona relatóriu no pedidu apoiu materiál husi Ensinu Baziku Filial (EBF) Atumanaru, ne’ebé hetan estragu tanba anin boot.
Diretór Servisu Edukasaun Munisípiu Bobonaro, Miguel Freitas, hatete ba STL liu husi via-telefoni, Kinta (17/09/2026), katak estragu ne’e akontese iha kuzinia eskola, liuliu iha parte kalen ne’ebé nakloke hotu.
“Iha EBF Atumanaru, mak foin hetan estragu husi anin boot. Konforme relatóriu ne’ebé tama mai husi EBF Atumanaru, kalen sobu hotu. Akontese hori bainrua, no horiseik sira nian relatóriu tama kedas, maibé husi ami-nia parte seidauk halo relatóriu ba ministériu nasionál,” nia informa.
Miguel dehan, agora Servisu Edukasaun Munisípiu Bobonaro sei halo rekapitulasaun kona-ba estragu ne’e no sei hato’o relatóriu ba Ministériu Edukasaun (ME). Eskola ne’e husu apoiu materiál hanesan kalen, pregu no besi.
Nia hateten katak, to’o agora, EBF Atumanaru mak eskola ida de’it ne’ebé foin hato’o relatóriu kona-ba estragu tanba anin boot. Maibé, eskola balun iha kalen ne’ebé aat ona no kontinua hato’o pedidu ba Servisu Edukasaun Munisípiu atu hetan apoiu.
“Ami foin simu relatóriu husi eskola ida de’it mak hetan estragu husi anin boot. Hau sempre apela ba sira liu husi enkontru no grupu katak, karik eskola ne’ebé estraga husi anin boot, informa lalais, atu ita bele halo relatóriu ba nasionál,” nia dehan.
Entretantu, Diretór Servisu Edukasaun Munisípiu Lautem, Aníbal Fernandes, hatete katak sira seidauk simu informasaun husi eskola sira kona-ba estragu tanba anin boot.
“Hatan ba asuntu ida ne’e, ami-nia parte
seidauk hetan informasaun ruma husi eskola sira, tanba ne’e seidauk iha informasaun,” nia afirma.
Enkuantu, Diretór Diresaun Nasionál Edukasaun Inkluziva no Asaun Sosial Eskolar (DNEIASE), Fernando Soares, hatete katak ME simu ona pedidu husi munisípiu sira no distribui ona materiál emerjénsia ba eskola ne’ebé hetan estragu.
Materiál ne’ebé distribui inklui kalen, baut no besi, no apoiu ne’e fó bazeia ba pedidu ne’ebé tama husi Servisu Edukasaun Munisípiu sira.
“Ita distribui ona materiál emerjénsia balun ba ita-nia eskola ne’ebé estraga. Numeru mak hau ladún lembra diak. Ita fó apoiu bazeia ba pedidu ne’ebé tama mai ami-nia diresaun. Kuandu pedidu tama, ami mós fó kedas apoiu ba sira,” nia akresenta.
Fernando hatutan, materiál hanesan besi, kalen no baut sei fó ba eskola sira ne’ebé hetan estragu, inklui estragu ki’ik, bainhira pedidu husi Diretór Servisu Edukasaun Munisípiu sira tama ba DNEIASE.
(jac)
