DILI, STLTIMORLESTE.com – Primeiru-Ministru (PM) Kay Rala Xanana Gusmão informa ba Prezidente Repúblika José Ramos-Horta katak sei viajen ba Tailándia iha fulan-outubru 2026, hodi partisipa iha workshop kona-ba Fundu Petrolíferu no halo vizita ofisiál ba nasaun ne’e.
PM Xanana hato’o informasaun ne’e bainhira remata enkontru semanal ho Prezidente Repúblika José Ramos-Horta, iha Palásiu Prezidensiál Nicolau Lobato, Bairo Pite, Dili, Kinta (17/09/2026).
“Hau mós informa ba Prezidente katak outubru hau sai ba Tailándia ba workshop kona-ba Fundu Petrolíferu, nomós vizita ofisiál ba Tailándia,” dehan PM Xanana ba jornalista sira.
Alende viajen PM ba Tailándia, PM Xanana hatete katak Prezidente Repúblika José Ramos-Horta sei viajen ba Nova Iorke, Estadus Unidus Amerikus, iha loron Sesta, hodi reprezenta Timor-Leste.
PM Xanana husu ba Prezidente atu reprezenta Timoroan sira iha enkontru internasionál ne’e, liuliu iha situasaun mundu ne’ebé konsidera kompleksu.
“Ita hotu husu ba Prezidente ba iha Nova Iorke ne’e reprezenta duni Timoroan. Nia sei ko’alia kapas kona-ba situasaun mundu nian agora. Situasaun mundu nian agora ulun moras tebes, maibé pasiénsia,” dehan PM Xanana.
Iha enkontru semanal ne’e, Prezidente Ramos-Horta mós husu ba PM Xanana atu fo indultu ba sidadaun rua ka tolu ne’ebé atualmente iha prizaun tanba komete krime hatama sigaru ilegal liuhosi fronteira.
PM Xanana hatete katak, pedidu ne’e envolve sidadaun sira ne’ebé hetan pena prizaun tinan rua, tuir desizaun tribunal.
PM Xanana mós subliña importánsia atu kontinua hametin konfiansa malu no prosesu rekonsiliasaun iha Timor-Leste.
Kona-ba kestaun rekonsiliasaun entre lideransa nasionál sira, PM Xanana hatete katak Timor-Leste nu’udar Estadu demokratiku ida ne’ebé bele sai ezemplu ba mundu.
Nia hatete katak durante tinan 24 independénsia, Timor-Leste liu ona situasaun difísil, liuliu konflitu iha períodu 2004 to’o 2009.
“Ita nu’udar Estadu demokratiku ida, ita sai ezemplu boot tebes diak ida ba mundu tomak. Iha 24 anos mos laiha problema. Ita nia problema boot mak iha 2004-2009. Depois nune’e ita temi dehan adeus konflitu, bem-vindo dezenvolvimentu,” dehan PM Xanana.
Nia hatete katak, dezenvolvimentu presiza kontinua, maibé konflitu verbál, insultu no violénsia entre sidadaun sira bele sai obstákulu ba unidade nasionál.
“Demokrasia ne’e sai ida-idak iha nia hanoin. Ida ne’e hanoin metan, hau hanoin mutin, ida ne’e hanoin mean, ida ne’e hanoin verde. Importante labele organiza malu atu problema,” dehan PM Xanana.
PM Xanana subliña katak, diferensa ideia polítika no partidu sira tenke respeita, no lideransa nasionál presiza buka dalan atu ko’alia no serbisu hamutuk.
(eme)
