BAUCAU, STLTIMORLESTE.com – Loron tolu de’it anin sobu uma komunidade hamutuk 58 iha Munisípiu Baucau, maibé Autoridade Protesaun Sivíl seidauk fó apoiu emerjensia, tanba stok fós iha armajen mamuk.
Komandante Operasaun Autoridade Protesaun Sivíl (APC) Munisípiu Baucau, Francisco Viana Freitas aprezenta, husi loron 13 to’o 16 Setembru ne’ebé anin bo’ot akontese iha área Munisípiu Baucau rezulta uma hela fatin komunidade nian barak hetan estragus, tanba sobu, maibé la rezulta ema kanek.
“Ligadu anin boot ne’ebé akontese em jerál iha Munisípiu Baucau husi, dadus ne’ebé ami rekolla iha ona ami nia edifísiu purvolta 58 famílias. Husi total ne’e, Quelicai rejista família afetada 22, Matebian 12, nomos Postu seluk balu resjistu haat lima tama hamutuk mai mak hamutuk 58,” Francisco informa ba jornalista sira edifisiu APC Tirilolo Baucau, Kinta (17/09/2026).
Nia esplika, husi dadus provizoriu 58 parte APC seidauk hatene kategoria estragus hanesan total estragus kamaan, natoon no totál, aliende mos tipu uma hanesan uma hela fatin, armajen no dapur, tanba ekipa sei halo verifikasaun iha terrenu.
Nia subliña, parte Autoridade Protesaun Sivíl sei fó apoiu emerjensia ba komunidade vítima sira ne’ebé dadus iha ona APC, maibé provizoriu atual seidauk bele fó apoiu emerjensia, tanba stock fós iha armajen APC Baucau mamuk.
“Automatikamente ida ne’e ita sei fó apoiu, maibé agora sasan seluk sei iha ligadu ho stok fós laiha. Maibé pedidu ba ona; kuandu fós mai ona ita halo distribuisaun apoiu emerjénsia,” Francisco akresenta
Nia komenta, númeru família vítima anin sobu posibilidade sei bele aumenta liu 80, tanba atual anin boot kontinua akontese iha área foho juridiku Munisípiu Baucau nian.
Tanba ne’e apela ba komunidade atu aumenta kuidadu durante kondisaun tempu ekstremu, inklui evita sunu rai arbiru, tesi ai arbiru no soe lixu arbiru iha mota, ne’ebé bele aumenta risku inundasaun no erozaun bainhira udan boot akontese.
(tom)
