DILI, STLTIMORLESTE.com — Timor-Leste (TL) no Japaun konkorda atu hametin liután relasaun amizade no kooperasaun liuhusi involvimentu povu, liuliu juventude, hodi reforsa ligasaun entre nasaun rua iha futuru.
Konkordánsia ne’e hato’o husi Eis-Embaixadór Japaun ba Timor-Leste no Prezidente Asosiasaun Lorosa’e-Nippon, Iwao Kitahara, hafoin enkontru ho Primeiru-Ministru (PM) Kay Rala Xanana Gusmão iha Palásiu Governu, Dili, Kinta (17/09/2026).
Iwao Kitahara akompanha husi nia kaben, Yoshiko Kitahara, vizita fali Timor-Leste no hasoru PM Xanana Gusmão hodi ko’alia kona-ba dezenvolvimentu relasaun amizade no kooperasaun entre nasaun rua no povu sira.
“Ha’u kontente tebes mai fali Timor-Leste, mai iha ne’e hodi hasoru-malu mós ho Primeiru-Ministru Xanana Gusmão. Ami konkorda atu dezenvolve liután relasaun amizade entre Timor-Leste no Japaun, no entre povu Timor-Leste ho povu Japaun. Ha’u fiar katak povu, liuliu joven sira, forte no nasaun mós forte,” dehan Kitahara.
Kitahara, ne’ebé mós hala’o kna’ar nu’udar Konsúl-Jerál Onoráriu Timor-Leste iha Japaun, hateten katak sei kontinua servisu maka’as hodi kontribui ba dezenvolvimentu Timor-Leste iha futuru.
Nia mós hatudu konfiansa katak, ho lideransa PM Xanana Gusmão, Timor-Leste sei kontinua dezenvolve liután.
Iha resposta ba pergunta jornalista STL kona-ba nia esperiénsia durante hala’o kna’ar nu’udar Embaixadór Japaun ba Timor-Leste, Iwao Kitahara hateten katak nia sente kontente tanba durante períodu servisu, konsege kontribui ba kooperasaun entre nasaun rua.
Nia mós temi kona-ba kooperasaun ne’ebé kontribui ba harii Portu Iwao Kitahara Mahata, ne’ebé agora uza naran nia nu’udar forma apresiasaun ba kontribuisaun durante nia kna’ar diplomátiku iha Timor-Leste.
“Ohin ha’u hasoru Primeiru-Ministru Kay Rala Xanana Gusmão atu hametin kooperasaun no servisu hamutuk, nune’e ita bele serbisu hamutuk hodi dezenvolve nasaun Timor-Leste ba oin,” dehan nia.
Iwao Kitahara hala’o kna’ar nu’udar Embaixadór Japaun ba Timor-Leste husi fulan-Setembru 2008.
Durante nia períodu servisu iha Timor-Leste, Kitahara hetan esperiénsia kona-ba relasaun entre nasaun rua, ne’ebé agora sai baze importante atu kontinua hakle’an amizade no kooperasaun entre Japaun no Timor-Leste.
(jos)
