DILI, STLTIMORLESTE.com – Diretór Ezekutivu Servisu Migrasaun, Komisáriu Asistente Jorge Monteiro relata distribuisaun fulan Juñu hamutuk 40.302, Jullu 42.017 no Agostu 36.058 nu’udar númeru aas liu.
“Ita rejista estranjeiru hamutuk 282.304 tama Timor-Leste husi Janeiru to’o Agostu tinan 2026,” hatete Diretór Ezekutivu Servisu Migrasaun, Komisáriu Asistente Jorge Monteiro ba jornalista sira liu husi Konferensia Imprensa iha MI, Kinta (17/09/2026).
Nia dehan, lista nasaun entrada aas liu: Indonézia 82.193, Xina 11.340, Austrália 7.312, Portugál 6.236 no Filipina 1.682 ema.
Nia esplika, iha períodu hanesan, estranjeiru hamutuk 278.624 sai husi territóriu nasionál. Servisu Imigrasaun emite vistu turista hamutuk 135.170 iha períodu ne’e.
Nia informa, Servisu Imigrasaun simu orden Tribunál Primeira Instánsia Dili atu bandu estranjeiru 132 sai. Sira kompostu husi Xina 79 no Indonézia 53 tanba prosesu judisiál burla informátika.
“Iha períodu ne’e ami aplika rekuza entrada ba estranjeiru 82 tanba la kumpre rekizitu tama territóriu,” nia informa.
Nia hatutan, medida administrativa liuhosi expulsaun no abandona voluntáriu aplika ba sira ne’ebé viola kondisaun vistu.
(jen)
