DÍLI, STLTIMORLESTE.com — Kapitaun FC Humbuti, Gabriel Da Conceção hateten, nia sente kontente no orgullu ho esforsu tomak husi nia ekipa, depois de FC Humbuti konsege derrota FC Verbitas liu hosi disputa penalti ho skor 7–6, hodi sai terseiru lugar iha kompetisaun futebol Copa Institutu Superior Dom Bosco 2026.
Partida ne’e realiza iha Campo Futebol Dom Bosco, Comoro, Dili, no Gabriel ko’alia ba jornalista STL iha kampo refere iha Kuarta-feira, 16/09/2026.
Gabriel hateten, rezultadu ne’e hetan liu hosi esforsu no luta tomak husi jogador sira, maski FC Humbuti iha situasaun difísil tanba FC Verbitas domina jogu iha parte barak.
“Hau nudar kapitaun husi FC Humbuti senti kontente no orgullu tebes tanba ami bele derrota FC Verbitas no sai terseiru lugar iha Copa Institutu Superior Dom Bosco. Ho esforsu maka’as husi ami nia ekipa, ami bele konsege manan,” hateten Gabriel.
Nia esplika katak, iha primeiru parte no inísiu segundu parte, FC Verbitas hatudu dominasaun no lidera ho skor 2–0. Maibé, FC Humbuti la desiste no kontinua halo atake to’o konsege halo empate 2–2 iha minutu ikus, hodi lori partida ba disputa penalti.
Gabriel mos fó apresiasaun ba jogador sira hotu, liuliu guarda-redes FC Humbuti, ne’ebé halo esforsu maka’as iha sesaun penalti no konsege defende ida husi tentativa penalti FC Verbitas.
Nia hateten katak, terseiru lugar ne’e sei sai motivasaun ba FC Humbuti atu kontinua hametin preparasaun iha futuru.
Aleinde selebra rezultadu ne’e, FC Humbuti planeia realiza programa han hamutuk ho komunidade no misa ida hanesan forma atu fó agradese ba komunidade sira ne’ebé kontinua fó apoiu ba ekipa durante kompetisaun.
“Ho terseiru lugar ida-ne’e, ami sei halo programa atu haan hamutuk ho komunidade sira, tanba durante ne’e komunidade barak mak fó apoiu ona ba ami nia ekipa,” dehan Gabriel.
FC Humbuti mos iha esperansa atu kontinua treinu ho maka’as, ho objetivu atu iha kompetisaun Copa Institutu Superior Dom Bosco 2027 bele luta ba pozisaun aas liu.
(leo)
