DÍLI, STLTIMORLESTE.com — Taekwondo nu’udar modalidade arte marsiais ne’ebé hala’o ona atividade desportiva iha Timor-Leste, ho doza sira namkari iha munisípiu sira. Ida husi sira mak Doza Taekwondo São Pedro, Comoro, Dili, ne’ebé kontinua fó treinamentu ba atleta sira, liuliu labarik no joven.
Tuir Sabang Doza Taekwondo São Pedro, Arnaldo Ferdial Lopes, ka konhesidu ho naran “Sabang Manis”, doza ne’e halibur atleta hamutuk 60, ho apoiu husi sabang nain tolu. Atleta sira ne’ebé partisipa iha treinamentu hahu hosi idade tinan 6 ba leten.
Arnaldo Ferdial Lopes ko’alia ba jornalista STL iha Doza Taekwondo São Pedro, Comoro, Dili, iha Kuarta (16/09/2026), no hateten katak objetivu treinamentu mak atu ajuda atleta sira komprende no dezenvolve téknika Taekwondo ho diak.
“Ami iha ne’e halibur labarik hamutuk 60, maibé ohin loron labarik barak la mai tanba okupadu ho eskola. Sira mai barak liu iha loron Domingu. Atleta sira iha idade tinan 6 ba leten, atu materia ne’ebé ami fó ba sira bele komprende ho diak,” hateten Arnaldo.
Nia esplika katak, tuir estatutu federasaun, ezame ba subida sintu hala’o tuir periodu ne’ebé determina ona. Maibé, iha momentu ne’e, Doza São Pedro seidauk bele hala’o ezame iha Ginásiu Dili tanba prosesu karta despaxu ba Ministériu Juventude, Desportu, Arte no Kultura (MJDAC) seidauk kompletu.
Tanba situasaun ne’e, atleta sira halo ezame iha doza ida-idak, no tuir planu, fulan haat tuir mai sei hala’o ezame iha Ginásiu Dili.
Arnaldo hateten katak, atleta sira ne’ebé sei tuir ezame sei komesa hosi sintu mutin to’o sintu mean, tuir regra no estatutu federasaun.
Aleinde treinamentu regular, atleta Doza Taekwondo São Pedro mos partisipa iha kompetisaun nasional no internasionál. Tuir Arnaldo, balun husi atleta sira konsege hetan medalha iha kompetisaun sira ne’e.
“Iha ne’e ami nia atleta balun sempre ba tuir kompetisaun iha rai laran no mos iha rai liur. Hau rasik sempre lori sira ba tuir kompetisaun, liuliu jogu bilateral entre Indonézia no Timor-Leste, ne’ebé hala’o iha Provínsa Nusa Tenggara Timur, Cidade Kupang, no sira konsege hetan medalha,” nia hateten.
Doza Taekwondo São Pedro agora kontinua fó prioridade ba treinamentu regular, ho objetivu atu dezenvolve kapasidade téknika no disiplinu atleta sira, no prepara sira atu partisipa iha kompetisaun nasional no internasionál iha futuru.
(leo)
