DILI, STLTIMORLESTE.com – Palásiu Prezidensiál Nicolau Lobato odamatan loke ba ema hotu no serka ne simu vizita husi Orfanatu Madre Dominikana no International Eagle Kids School.
Palásiu Prezidensiál Nicolau Lobato iha Dili, Sexta-feira (18/09/2026), simu komitiva husi Orfanatu Madre Dominikana, hosi Rejiaun Administrativa Espesiál Oekusi-Ambeno (RAEOA), no International Eagle Kids School.
Vizita husi Orfanatu Madre Dominikana kompostu hosi ema na’in-21, inklui labarik no foin-sa’e sira ne’ebé mai hosi Oekusi hodi koñese instalasaun no ambiente iha sede Prezidénsia Repúblika.
Enkuantu, International Eagle Kids School lori komitiva ho total ema na’in-62, kompostu hosi estudante na’in-42 no mestre ka profesór na’in-20.
Vizita estudante sira ne’e iha natureza edukativu no siviku, hodi fó oportunidade ba alunu sira atu aprende diretamente kona-ba istória, kultura, identidade nasionál no funsionamentu instituisaun demokrátika.
Vizita sira ne’e fó oportunidade ba labarik no estudante sira atu aprende kona-ba Prezidénsia, istória, kultura, sidadania no identidade nasionál Timor-Leste ho esperiénsia direta.
Simu komitiva rua ne’e mós hatudu esforsu Prezidénsia Repúblika atu hakbesik instituisaun Estadu ba jerasaun foun, liuhusi atividade edukativu no kulturál.
Inisiativa ne’e espera bele kontribui ba dezenvolvimentu koñesimentu labarik no foin-sa’e sira kona-ba sidadania, patriotizmu no responsabilidade nu’udar sidadaun Timor-Leste.
Vizita ba Palásiu Prezidensiál mós sai oportunidade ba estudante no labarik sira atu haree diretamente fatin ne’ebé Prezidente Repúblika hala’o ninia knaar no reprezenta Estadu.
(eme)
