BAUCAU, STLTIMORLESTE.com – Jenerál Taur Matan Ruak sei kompleta idade 70 iha loron 10 Outubru 2026, no antes to’o idade ne’e, nia koko ona kapasidade fiziku liuhusi lao ain sa’e foho boot rua iha Timor-Leste.
Taur Matan Ruak, moris iha Postu Administrativu Baguia, Munisípiu Baucau, loron 10 Outubru 1956.
“Dia 10 Outubru 2026 agora ne’e hau halo 70 anos. Besik 70 anos ne’e hau sa’e foho boot rua iha Timor laran, hau testa hau nia kapasidade rezisténsia. Hau 70 anos sei bele,” hateten Taur Matan Ruak, bainhira koalia iha Sentru Konvensaun Vila Antiga Baucau, Sesta (18/09/2026).
Esforsu ne’e la’ós de’it kona-ba sa’e foho, maibé mos atu haree kapasidade fizika bainhira nia tama idade 70.
Nia esperiénsia kona-ba atividade físika ne’e mos sai parte ida husi nia maneira atu prepara-an hasoru mudansa físika ne’ebé normal akontese bainhira ema tama idade avansadu.
Nia mós apela ba ema sira ne’ebé idade menus 70 atu tau matan ba saúde no kapasidade fiziku.
“Se hau bele, ita boot sira menus 70 anos bele liu, maibé depende ba ita boot sira oinsá tau matan ba ita boot sira nia saúde. Hau preokupa númeru ema ne’ebé mate menus 60 anos,” dehan nia.»
Ba Taur, moris naruk la’ós de’it kona-ba idade, maibé depende mós ba maneira ema ida tau matan ba saúde no estilo moris loroloron.
Nia fahe buat tolu ne’ebé, tuir nia hanoin, importante ba ema ne’ebé hakarak moris naruk, tenke hili hahán ho kuidadu, halo ezersísiu no evita estres.
“Se mak hakarak moris naruk, iha buat tolu mak nia tenke halo. Primeiru hili mak han, tanba buat ne’ebé ita hatama determina ita nia destinu. Segundu halo ezersísiu oituan, tanba tur akumula bokur sira la diak, entaun prejudika ita nia saúde,” dehan Taur
Nia mós fó atensaun ba nesesidade atu evita estres no tau prioridade ba deskansu adekuadu.
“Labele estres. Kalan isin lolon toba, ulun mós tenke toba, ulun badiu,” hateten nia
Taur subliña katak kuidadu saúde tenke hahú husi hahán, movimentu fiziku no kontrolu estres, liuliu ba jerasaun Timor-Leste atu bele prevene problema saúde iha idade menus 60 anos.
(tom)
