BAUCAU, STLTIMORLESTE.com – Suku Sagadate, Postu Administrativu Laga, Munisípiu Baucau, konstrui Kapeliña ho orsamentu US$ 33.047 liuhusi atividade regulár Programa Nasionál Dezenvolvimentu Suku (PNDS) tinan 2026, atu fasilita sarani ba atividade espirituál.
Xefe Suku Sagadate, Aureliano de Jesus, hateten katak projetu Kapeliña refere atual progresu fiziku atinji ona 55%, no ekipa konstrusaun sei kontinua halo servisu ba sinta leten tuir dezeñu no planu konstrusaun.
Nia hateten, Kapeliña ne’e sei benefisia liuliu komunidade sarani katolika hosi aldeia lima, ne’ebé sei uza infraestrutura refere hodi hala’o misa no atividade espirituál sira ho asesu ne’ebé besik liu.
“Ami tarjeitu sei finaliza iha fulan-Novembru, no abertura sei halo ho inaugurasaun, misa no misa agradese,” hateten Aureliano de Jesus ba jornalista sira iha Sentru Konvensaun Vila Antiga Baucau, Sesta (18/09/2026)
Kapeliña refere konstrui ho medida metru 6 ba luan no metru 14 ba naruk, lokaliza iha área Sentru Beliuali.
Aureliano esplika katak orsamentu US$33.047 ne’e, iha inísiu planeia atu uza ba atividade kanalizasaun bee-mós. Maibé, depois halo reuniaun no haree ba nesesidade komunidade, Konsellu Suku deside muda prioridade orsamentu ba konstrusaun Kapeliña.
“Inísiu orsamentu ne’e planeia atu uza ba atividade kanalizasaun bee-mós, maibé depois reuniaun no haree ba ezijénsia komunidade, Konsellu Suku deside muda fali ba konstrusaun Kapeliña,” nia akresenta
Komunidade ne’ebé sei benefisia direita ba Kapeliña ne’e mak husi Aldeia Beliuali, IaSula, Naha-Afa, Auraba no Abuti.
Entertantu, Suku Sagadate iha totál aldeia 11, kompostu hosi Abuti, Alasafa, Auraba, Beliuali, Ia Sula, Naha-Afa, One-Bu’u, Samagata, Selegua, Sire-Bu’u no Ulabuti, ho populasaun hamutuk 3.485 hosi xefe família 913.
(tom)
