ATSABE, STLTIMORLESTE.com – Arrependimentu tenke lori mudansa ba moris, hahu husi katuas no ferik atu hametin dame no domin.
Padre Paróquia Atsabe sesante, Arnaldo Federico de Deus haktuir liafuan ne’e iha omilia durante Missa Agradecimento, Reconciliação no Bensaun Rate, Uma Lisan Lesubu Lia-Nain, Tiarlelo Ilat, Postu Administrativu Atsabe, Sesta (18/09/2026).
Nia hatete, leitura bíblika ohin loron koalia kona-ba istória José ho nia maun-alin sira, ne’ebé ikus mai simu malu maski antes iha relasaun moris-passado ne’ebé moruk. José la rai ódiu ba nia maun-alin sira, maibé simu sira ho matabén, tanba nia haree esperiénsia passado hanesan parte husi planu Maromak nian atu salva nia família.
Nia mos refere ba parábola Jesus kona-ba oan mane ki’ik ne’ebé gasta rikusoin hotu, depois fila ba uma ho lakon buat hotu, maibé aman simu no hakuak nia. Istória ne’e, tuir Padre Arnaldo, hatudu boot liu domin no misericórdia Maromak nian ba ema ne’ebé arrepende.
“Se ita arepende ona, presiza hadia ba oin, hahu husi katuas ho ferik sira. Bainhira fo liman no hakuak malu ona, ba oin buka hakiak ho liafuan no hahalok,” dehan nia.
Padre Arnaldo hatete, rekonsiliasaun labele sai deit momentu ida iha serimónia, maibé tenke hatudu ho evidénsia liu husi liafuan no hahalok iha moris loron-loron.
Nia konsidera kultura no lisan hanesan parte importante husi identidade komunidade, tanba tradisaun sira ne’e mai husi avo-beiala sira no presiza transmite ba jerasaun foun.
“Iha ita nia uma lisan hanesan ema kristaun, sasan eransa bele iha, maibé Kristu iha nafatin. Atu nia bele lori ita sai husi nakukun,” dehan nia.
Nia mos husu família sira atu la lakon domin no karidade ba malu, maski iha difikuldade ka konflitu. Karidade, tuir nia, tenke sai husi laran no la’ós deit liafuan.
Frei Abilio Gomes, SDB, nu’udar jerasaun foun husi Uma Lisan Lesubu Lia-Nain, hatete objetivu prosesu naruk ne’e mak halibur no bolu fila fali oan no bei-oan sira atu bele koñese malu, perdua no simu malu fali nudar família ida.
Nia hatete, prosesu rekonsiliasaun mos atu hametin tali amizade, domin no dame liu husi dalan rekonsiliasaun.
“Nu’udar ema-sarani Católico, Maromak hanorin ita atu hadomi malu, perdua malu no simu malu nu’udar maun no alin,” dehan Frei Abilio.
Nia refere mos ba Sagrada Escritura, ne’ebé hatudu kona-ba rekonsiliasaun Jacob ho nia maun Esaú no José ho nia maun-alin sira.
Frei Abilio hatete, Missa Eukaristia ne’e sai biban ba família sira atu fó agradese ba Maromak nia laran-luak no domin, no husu graça atu família boot ne’ebé iha relasaun familiar bele moris ho domin no misericórdia.
Enkuantu ne’e, Luis Gomes, nuudár jerasaun dahaat husi Uma Lisan Lesubu Lia-Nain, hatete jerasaun foun konsege realiza rekonsiliasaun no rate ne’ebé durante tinan barak la konsege hala’o.
Nia hatete, iha tempu uluk, avo sira no aman sira ukun Tiarlelo durante tinan barak no bele halo lei, maibé prosesu rate no kultura ne’e la konsege realiza.
“Ami agradese tebes ba Maromak, tanba ohin bele realiza rekonsiliasaun no bensaun ba rate. Ami lakohi atu tusan ne’e husik ba oan sira lori tan,” dehan Luis Gomes.
Nia hatutan, jerasaun dahaat mos iha tempu naruk la tur hamutuk no fó ulun ba malu, maibé agora konsege realiza enkontru ida ne’ebé nia konsidera hanesan istória foun ba família no jerasaun Uma Lisan Lesubu.
Antes Missa Rekonsiliasaun no Bensaun Rate, família sira hala’o mos reflesaun hamutuk ho Padre Paróquia Atsabe sesante no Bruder Nico Lay.
Rekonsiliasaun no serimónia rate ne’e realiza depois liu tinan 50, ho objetivu atu taka konflitu no diferensa passado, hametin dame, domin no relasaun família ba jerasaun sira tuir mai.
(dom)
