DILI, STLTIMORLESTE.com — Livru Mauberíadas, poema hosi Kay Rala Xanana Gusmão, lansa primeira vez iha Timor-Leste, Sesta-feira loraik, tuku 17:00, iha Embaixada Portugal iha Dili.
Serimónia lansamentu ne’e organiza hamutuk hosi Embaixada Portugal iha Dili no Plural Editores Timor-Leste, parte hosi Grupo Porto Editora, no hala’o iha Centro Cultural Português.
Eventu ne’e marka primeira vez Mauberíadas lansa iha Timor-Leste, ho prezensa autor, Kay Rala Xanana Gusmão, Embaixador Portugal, Duarte Bué Alves, Diretor-Jerál Plural, Hélder Carvalho, no konvidadu timoroan, portugés no internasionál sira.
Mauberíadas mak poema ne’ebé Xanana Gusmão hakerek iha tinan 1975, bainhira nia sei joven jornalista no regularmente asina nia hakerek iha semanáriu A Voz de Timor.
Poema ne’e hakerek ba konkursu literáriu ne’ebé administrasaun portuguesa promove iha 1975, liuhusi Centro de Informação e Turismo, ho tema “Kultura mak Liberdade Povu”. Iha konkursu ne’e, Mauberíadas hetan Prémio Primeiru no publika ba primeira vez iha 17 Maiu 1975.
Depois liu tiha tinan 50, obra ne’e sai fali iha forma livru, edita hosi Porto Editora/Plural Editores, hodi fó asesu ba públiku ne’ebé luan liu no lori tributu ba povu Timor-Leste.
Xanana: Literatura Importante ba Jerasaun Foun
Xanana Gusmão hatete katak Mauberíadas mak obra ne’ebé nia hakerek bainhira nia joven no agora hetan oportunidade atu publika fali hanesan livru.
Nia kompartilha mos esperiénsia kona-ba leitura no hakerek, inklui karta sira ne’ebé nia simu hosi leitor sira. Segundo Xanana, literatura bele kria ligasaun entre autor no leitor, maski sira hela iha fatin diferente.
Nia subliña importánsia leitura ba joven sira, tanba bele ajuda dezenvolve hanoin, koñesimentu no kapasidade hakerek.
Xanana mos hatete katak obra ne’e la’ós de’it literatura, maibé iha relasaun ho memória no istória hosi períodu importante ida iha Timor-Leste.
Embaixador: Obra Lori Memória Istórika
Embaixador Portugal iha Timor-Leste, Duarte Bué Alves, hatete katak iha honra boot ba Embaixada Portugal atu simu lansamentu primeira vez iha Timor-Leste ba livru Mauberíadas.
Nia esplika katak poema ne’e hetan prémiu iha konkursu literáriu iha 1975. Depois, texto ne’e lakon no la hatene ho klaru fatin ne’ebé nia hela.
Tuir nia, texto ne’e publika iha Angola iha tinan 1976, antes lakon tan. Doutor Roque Rodrigues mak deskobre no recupera fali texto ne’e, inklui rekonstitui nia kontéudu.
Duarte Bué Alves hatete katak Mauberíadas importante tanba obra ne’e ko’alia kona-ba períodu tranzisaun hosi fin kolonializmu no mudansa ba períodu istóriku foun.
Nia konsidera obra ne’e ajuda leitor sira komprende transformasaun sosiedade iha períodu ne’ebá, no mos hatudu dimensaun poétika hosi Xanana Gusmão.
Embaixador mos destaca ligasaun Xanana ho língua Portuguesa, literatura no promosaun kultura leitura, liuliu ba joven no iha eskola.
Nia hatete katak Mauberíadas bele sai sinal esperansa ba jerasaun foun no futuru língua Portuguesa iha Timor-Leste.
(jos)
