DÍLI, STLTIMORLESTE.com — FC Villa Ave Maria sai hanesan kampiaun kompetisaun futebol Copa Instituto Superior Dom Bosco (ISDB) 2026, depois de manan FC Mãe da Graça ho rezultadu 2–0, iha final ne’ebé hala’o iha Sesta-feira (18/09/2026), iha Kampu Futebol Dom Bosco, Comoro, Dili.
Jogu final ne’e dura durante minutu 80, ho arbitru Duarte, no asistente arbitru primeiru Domingos no asistente arbitru segundu Renato.
Desde apitu hahú, ekipa rua hatudu jogu ne’ebé mak forte, ho ataka no kontra-ataka malu. FC Mãe da Graça iha oportunidade balun atu ameasa baliza Villa Ave Maria, maibé goalkeeper Villa Ave Maria konsege defende ho diak, nune’e la iha golu akontese iha minutu inisiál.
To’o iha minutu 22, FC Villa Ave Maria hetan oportunidade no jogador ho naran Atinu, númeru kamizola 16, konsege hatama golu ba baliza FC Mãe da Graça. Golu ne’e halo Villa Ave Maria lidera 1–0.
Depois de golu ne’e, jogadores husi ekipa rua kontinua hatudu jogu ne’ebé kompetitivu. FC Mãe da Graça buka dalan atu halo igualdade, maibé to’o remata primeira parte, rezultadu nafatin 1–0 ba vantagem FC Villa Ave Maria.
Tama ba segunda parte, ekipa rua kontinua aumenta presáun no halo ataka ba malu. Iha parte ida-ne’e, FC Villa Ave Maria konsege domina kontrolu bola no kria oportunidade balun iha área penalti adversáriu.
To’o iha minutu 64, jogador FC Mãe da Graça halo falta iha área penalti, no FC Villa Ave Maria hetan oportunidade atu halo tiru penalti.
Jogador Carro, númeru kamizola 11, hetan konfiansa husi ekipa atu ezecuta penalti. Carro konsege ezecuta ho diak no hatama tan golu ida ba baliza Mãe da Graça, hodi aumenta vantagem Villa Ave Maria ba 2–0.
Depois de golu daruak, FC Mãe da Graça kontinua buka oportunidade atu reduz diferensa, maibé defesa Villa Ave Maria konsege tahan ataka sira. To’o apitu ikus, la iha tan golu akontese.
Ho rezultadu 2–0, FC Villa Ave Maria sai hanesan kampiaun Copa Instituto Superior Dom Bosco 2026, enquanto FC Mãe da Graça ocupa segundu lugar no FC Humbuti remata iha terseiru lugar.
(leo)
