DILI, STLTIMORLESTE.com – Konstruksaun dapur ba tein programa merenda eskolar iha Ensinu Baziku Filial (EBF) Naroman, Suku Bairo Pite, Munisípiu Dili, atinji ona 90%.
Kordenadora EBF Naroman, Joana Teresa Freitas, hatete ba STL iha nia fatin servisu, Segunda-feira (21/09/2026), katak konstrujsaun dapur ne’e seidauk remata, tanba obra ne’e hala’o liuhusi programa PNDS.
Nia hatete katak, tuir nesesidade eskola nian, tinan ida-ne’e sei refetoria ba EBF rua iha Suku Bairro Pite, mak EBF Naroman no EBF Fatumeta.
“Konaba merenda eskolar, lao hanesan bai-bain. Fornesedór sira tein uza ai-sunu, tanba estudantes barak. Fornesedór sira mak hakarak uza ai hodi tein merenda ba estudantes. Iha fornesedór nain lima ne’ebé tein ba estudantes, loron ida tein dala rua,” Joana dehan.
Nia esplika katak, menu merenda eskolar bazeia ba orientasaun menu ne’ebé fó husi Servisu Edukasaun Munisípiu Dili. Total estudantes hamutuk besik 800 asesu ba programa merenda eskolar iha EBF Naroman.
Joana dehan, tuir planu, konstrusaun dapur merenda eskolar ne’e sei entrega ba eskola no sei remata iha fulan ida-ne’e.
“Fulan nee finaliza ona ami nia konstruksaun merenda eskolar, atu fornesedór sira bele uza ona dapur foun hodi tein merenda ba estudantes, tanba dadaun nee besik finaliza ona,” nia dehan.
Enkuantu ne’e, xefi fornesedór iha EBF Naroman, Adelina Soares, dehan kada loron sira prepara hahan ba estudantes dala rua, tuir oráriu entrada estudante sira nian.
“Ami tein uza ai-sunu, tanba dapur foun seidauk remata. Agora ami sei uza dapur tuan hodi tein merenda eskolar ba estudantes. Ami nain lima mak tein ba estudantes sira,” nia informa.
Nia akresenta katak, estudantes sira asesu merenda eskolar tuir oras ne’ebé determina ona no fornesedór sira tein hahan bazeia ba menu ne’ebé iha manual.
Estudante EBF Naroman, Rosalina Gomes Nunes hatete katak, nia kontente tanba kada loron bele asesu ba merenda eskolar iha eskola.
“Nu’udar estudante, hau sente kontente tanba kada loron mai eskola ami asesu ba merenda eskolar. Ami han na’an, modo tahan, aifuan no fore munggu. Ami mai forma no simu hahan iha dapur, depois fornesedór sira fahe hahan ba ami,” nia informa.
(jac)
