DILI, STLTIMORLESTE.com – Eskola Sekundária Jerál Públika (ESGP) 5 de Maio Becora sei hala’o enkontru ho profesór sira, hodi prepara no forma ekipa ne’ebé sei responsabiliza ba organizasaun Ezame Nasional no Ezame Lokal.
Diretór ESGP 5 de Maio Becora, Julio Maia Castro de Jesus hatete ba STL, Segunda-feira (21/09/2026), katak enkontru ho profesór sira sei fó oportunidade ba eskola atu diskute preparasaun ba ezame no forma ekipa ba ezame rua ne’e.
“Konaba preparasaun Ezame Nasional, ami sei halo enkontru ho ami-nia profesór sira, hodi ko’alia kona-ba preparasaun Ezame Nasional no forma ekipa ba Ezame Nasional no Ezame Lokal,” nia esplika.
Julio hatete, estudante finalista sira ne’ebé sei partisipa iha Ezame Nasional hamutuk 348 estudante, no lista estudante sira ne’e eskola hatama ona ba Ministériu Edukasaun.
Nia hatete katak eskola sei kontinua halo preparasaun, inklui forma ekipa ne’ebé sei responsabiliza ba prosesu Ezame Nasional no Ezame Lokal.
Enkuantu ne’e, estudante ESGP 5 de Maio Becora, António Maia, hatete katak estudante finalista sira presiza prepara an molok tuir ezame iha fulan oin.
“Nudar estudante, ami presiza esforsu an estuda, tanba tempu besik ami, estudante finalista sira, sei tuir Ezame Nasional. Kada loron ami tuir aula, tanba ami-nia profesór sira hanorin tuir oráriu ne’ebé iha ona,” nia deklara.
Estudante seluk, Zulmira da Costa, hatete katak estudante sira presiza estuda no prepara an diak tanba sei hasoru Ezame Nasional no Ezame Lokal iha fulan oin.
“Hau hanoin buat hotu atu lao diak iha ezame, ita-nia esforsu rasik mak importante. Kuandu ita la estuda, ita sei la iha preparasaun ba ezame rua ne’e, ne’ebé mak Ezame Nasional no Ezame Lokal,” nia haktuir.
Iha parte seluk, Diretór Servisu Edukasaun Munisipiu Bobonaro, Miguel Freitas, hatete katak preparasaun ba Ezame Nasional no Ezame Lokal tenke hala’o husi eskola ida-idak, liuhusi formasaun ekipa ne’ebé sei haree ba prosesu ezame sira ne’e.
“Liga ba preparasaun Ezame Nasional no Ezame Lokal nian, hau hanoin ne’e husi ita-nia eskola mak sei prepara ekipa ida, no estudante finalista sira sei partisipa iha Ezame Nasional no Ezame Lokal iha fulan oin,” nia dehan.
(jac)
