BAUCAU, STLTIMORLESTE.com – Komando Polísia Nasionál Timor-Leste (PNTL) hala’o inspesaun no auditoria ba sistema servisu iha Komando Polísia Munisípiu Baucau, ho objetivu atu avalia no hadi’a sistema operasaun no administrasaun polísia.
Inspetor-Jerál PNTL, Komisáriu Asistente Hermenegildo Gonçalves da Cruz esplika katak, auditoria ne’e iha objetivu prinsipál rua, mak inspesaun ba sistema servisu operasaun no auditoria ba sistema servisu administrasaun.
“Ohin prezensa iha Komando Polísia Munisípiu Baucau iha objetivu rua: halo inspesaun auditoria ba sistema servisu operasaun no auditoria ba servisu administrasaun. Iha parte rua boot ne’e iha nia substánsia tuir mai, kona-ba servisu operasaun iha téknika, disiplinar no mós finanseiru,” Hermenegildo hateten liuhusi diskusaun iha sesaun vizita ba Komando Polísia Munisípiu Baucau, Segundu (21/09/2026)
Tuir Hermenegildo, auditoria la’ós ho objetivu atu buka sala husi individu ida-idak, maibé atu identifika frakeza iha sistema no buka solusaun atu hadi’a mekanizmu servisu.
“Bainhira haree tiha sistema sira ne’e, atu halo saida? Karik sistema sira ne’e la funsiona, entaun obrigasaun husi informasaun no mós dadus sira ne’ebé foti bele halo hadi’a sistema ne’e,” nia esplika.
Nia mós subliña katak, se sistema servisu ida di’ak ona, presiza kontinua halo melloramentu. Maibé, se sistema funsiona maibé implementasaun iha nivel kraik seidauk efetivu, entaun presiza haree kapasidade rekursu umanu.
Nia hatutan katak, auditoria ne’e mós buka atu fó oportunidade ba instituisaun hodi hadi’a kapasidade no dezenvolve kompeténsia profisionál dos polísia sira.
Hermenegildo subliña katak objetivu auditoria la’ós atu buka ka akuzasaun ba individu ida nia sala ka hahalok ne’ebé la loos, maibé atu avalia sistema no identifika área sira ne’ebé presiza hadi’a.
“Objetivu prinsipál rua ne’e, la iha objetivu ida mak dehan katak atu buka individu ida nia sala ka individu ida nia hahalok ne’ebé la loos. Entaun diskusaun auditoria buka atu hadi’a buat rua ne’e,” nia afirma.
Ba realizasaun inspesaun no auditoria ne’e, Inspetor-Jerál PNTL hato’o apresiasaun ba apoiu no kolaborasaun husi lideransa Polísia Munisípiu Baucau, inklui komandante no komandante seksaun sira.
“Ho sira nia apoiu no kolaborasaun ho komandante na’in rua no komandante seksaun, ekipa bele iha susesu ba inspesaun no auditoria ida ne’e,” Hermenegildo komenta.
(tom)
