DILI, STLTIMORLESTE.com – Prezidente Repúblika (PR), Ramos-Horta kondekora Profesór Babafemi A. Badejo ho Medalla Ordem Timor-Leste (TL), nu’udar rekoñesimentu ba ninia kontribuisaun internasionál.
Prezidente Repúblika José Ramos-Horta kondekora Medalla Ordem Timor-Leste ba Profesór Babafemi A. Badejo, Ph.D., LL.B., jurista, mediadór, akadémiku no eis-ofisiál Nasoins Unidas ne’ebé hala’o ona kna’ar iha pozisaun aas.
Tuir komunikadu ne’ebé STL asesu iha Tersa-feira (22/09/2026), serimónia kondekora ne’e hala’o iha Misaun Permanente Timor-Leste nian ba Nasoins Unidas iha Nova Iorke.
Medalla Ordem Timor-Leste ne’e fó nu’udar rekoñesimentu ba kontribuisaun Profesór Badejo nian iha Misaun Nasoins Unidas iha Darfur no Somália.
Profesór Badejo simu Medalla Ordem Timor-Leste tuir Dekretu Prezidente Repúblika N.º 107/2026, nu’udar rekoñesimentu ba ninia kontribuisaun ne’ebé destakadu iha misaun ONU nian.
Profesór Badejo hala’o kna’ar nu’udar Xefe Gabinete Prezidente Ramos-Horta nian durante Prezidente nia mandatu nu’udar Reprezentante Espesiál Sekretáriu-Jerál ONU, Ban Ki-moon, hosi Janeiru 2013 to’o Juñu 2014.
Prezidente Ramos-Horta mós kaer kargu Sub-Sekretáriu-Jerál iha sistema ONU nian, nu’udar Timor-oan úniku ne’ebé servisu iha ONU ho pozisaun aas hanesan ne’e.
Hafoin misaun ida-ne’e, Prezidente Ramos-Horta hetan nomeasaun tan nu’udar Prezidente Painél Nivel-Aas kona-ba Operasaun Pás ONU nian, hosi 2014 to’o 2016. Iha tinan 2017 to’o 2019, nia mós serbisu iha Konsellu Nivel-Aas kona-ba Mediasaun iha okos lideransa Sekretáriu-Jerál António Guterres.
Profesór Badejo nia karreira, ne’ebé inklui tinan barak servisu ho Nasoins Unidas, konsidera ezemplu hosi espíritu solidariedade internasionál no luta ba liberdade no justisa.
Prezidente Ramos-Horta hato’o parabéns ba Profesór Babafemi A. Badejo no agradese ninia kompromisu metin ba prinsípiu justisa, diálogu no kooperasaun internasionál, ne’ebé Ordem Timor-Leste fó onra.
Iha ninia diskursu, Prezidente Ramos-Horta elojia Profesór Badejo hanesan “belun loloos Timor-Leste nian no kampeaun pás nian”, no subliña katak ninia esforsu inkansável kontribui ba estabilidade iha rejiaun sira ne’ebé hasoru dezafiu boot iha mundu.
Serimónia ne’e mós hetan partisipasaun hosi ofisiál superiór Governu nian, membru korpu diplomátiku, família no belun sira hosi Profesór Babafemi A. Badejo.
(eme)
