DILI, STLTIMORLESTE.com – Ema ne’ebé rona Maromak nia liafuan no halo tuir nia hanorin, sai maun-alin Jezús iha família foun iha Na’i.
Padre Paul Kerans SVD hato’o refleksaun ba STL, Tersa (22/09/2026), bazeia ba Evanjellu Lucas 8:19-21, kona-ba Jezús nia família foun.
Iha Evanjellu ohin, Jezús nia inan no maun-alin sira buka nia, tanba sira preokupa ho nia no hakarak hasoru nia bainhira nia hanorin ema sira iha uma laran.
Maibé, Jezús hatudu katak nia forma família foun ida, la’ós bazeia de’it ba ligasaun raan, maibé ba ema hotu ne’ebé rona Maromak nia liafuan no halo tuir.
“Ema hotu ne’ebé rona Maromak nia liafuan, bainhira nia hanorin, no halo tuir, agora sai nia inan no maun-alin sira,” hatete Padre Paul.
Nia esplika katak, ida-ne’e karik susar ba Jezús nia família raan atu simu, tanba Jezús la pertense ona ba sira de’it, maibé nia fó konvite ba ema hotu atu sai membru hosi nia família foun.
Padre Paul hatete katak, ema sira ne’ebé halibur iha Eukaristia mak membru hosi Jezús nia família foun, tanba sira rona nia liafuan no rekoñese nia nu’udar maun-alin.
“Ne’e furak tebes katak bainhira ita rona nia liafuan, ita rekoñese nia nu’udar nia maun-alin sira,” hatete nia.
Tuir Padre Paul, relasaun ne’ebé Jezús hakarak ho ema ida-idak mak relasaun ne’ebé hanesan no kle’an liu fali relasaun ne’ebé ita iha ho membru família biolójiku sira.
Evanjellu ne’e garante katak, se ema haka’as-an atu rona Maromak nia liafuan no moris tuir nia, ema ne’e bele sai maun-alin iha Na’i.
(eme)
