BAUCAU, STLTIMORLESTE.com – Deskonfia komvoiu ida halo asaun tuda uma iha Bairo Caisa’e, Suku Buruma, Postu Administrativu Baucau Vila, Munisípiu Baucau, rezulta idozu Januário Freitas Belo sofre kanek iha nia rentos to’o desmaia.
Xefe Bairo Caisa’e, Adolfo da Silva aprezenta katak, asaun ne’e akontese iha loron 20 Setembru 2026 liu tuku 22:00, bainhira komvoiu refere fila husi hakoi mate iha Suku Seiçal, Postu Administrativu Baucau Vila.
Tuir nia esplikasaun, komvoiu ne’e akompaña husi Polísia Eskuadra Postu Baucau Vila no bainhira to’o iha área eis Prizaun, Caisa’e, ema sira ne’ebé involve iha komvoiu ne’e haklalak, uza gás motor no tuda uma komunidade tutuir dalan to’o área Marobo Caisa’e, afeta ba idozu Januário Freitas Belo ne’ebé sai ba liur atu soe foer kiik, fatuk kona iha rentos sofre kanek to’o desmaia.
“Tuda kona katuas ne’e nia rentos nia desmaia. Tuda kona katuas ne’e iha jam 22:00, jam 00:00 mak foin lori ba ospitál, nia rentos nee suku pontu rua. Problema ida ne’e ami la hatene, tanba saida akontese hanesan ne’e, Polísia ho kareta uluk movimentu ne’e ho motor tuir to’o iha Caisa’e sira halo barollu,” hateten Adolfo ba jornalista sira iha Marobo Caisa’e, Tersa (21/09/2026)
Adolfo dehan, komunidade Caisa’e la hatene motivu klaru husi asaun komvoiu refere, tanba iha momentu ne’ebá, komunidade la halo asaun kontra komvoiu.
Tuir informasaun ne’ebé nia simu, iha alegasaun katak asaun tuda hahú husi sidadaun Caisa’e, maibé Xefe Bairo ne’e rejeita alegasaun refere.
Tanba nia afirma katak komunidade Caisa’e no Buruma tomak iha ona regulamentu tara bandu, no komunidade tenke respeita malu, inklui ema, ambiente no balada.
“Caisa’e oan la simu hasoru ho asaun tuda no seluk tan, tanba la hatene motivu ba asaun ne’ebé grupu komvoiu halo. Hodi kalan ami la halo buat ida ba sira, komvoiu ne’e sira ba tiha de’it,” nia dehan.
Xefe Bairo Caisa’e mós manifesta preokupasaun tanba Polísia Eskuadra Postu Baucau Vila akompaña komvoiu refere, maibé la halo atuasaun masimu hodi ema sira ne’ebé involve iha komvoiu refere tuda uma to’o rezulta idozu ida tenke kanek.
Tanba ne’e, Adolfo husu Polísia Nasionál Timor-Leste (PNTL), liuhusi Komando Polísia Munisípiu Baucau no Eskuadra Postu Baucau Vila, atu investiga kazu ne’e ho klean, inklui identifika ema sira ne’ebé involve iha komvoiu refere.
“PNTL mak tenke deskobre movimentu ida la’o mai ne’e, kaer ida para investiga se mak tuda, i ami iha bairo ida ne’e mak tuda sira karik iha fatin ne’ebé sira tenke relata ba Polísia,” rekomenda Adolfo.
Adolfo mós dehan nia deskonfia ema balu ne’ebé involve iha komvoiu refere bele mai husi grupu arte marsiais balu. Maibé nia subliña katak alegasaun ne’e presiza prova no investigasaun autoridade kompetente.
Nia afirma maioria jovem iha Bairo Caisa’e envolve iha grupu arte marsiais, maibé komunidade kontinua kumpri regulamentu tara bandu Suku Buruma no evita konflitu, tanba ne’e entrega tomak ba Polísia halo investigasaun.
“Kazu ne’e hodi kalan kedas ita nia Polísia akompaña tiha ona. Oinsá atu rezolve ne’e iha ona Polísia nia liman, maibé ami nafatin rekomenda tenke investiga,” nia dehan.
Adolfo subliña katak kazu refere iha ona autoridade seguransa nia liman no husu PNTL atu halo investigasaun klean hodi hatene kronolojia, motivu no ema sira ne’ebé involve iha asaun refere.
Aliende, Adolfo mós sujere ba Autoridade Seguransa atu fó imitasaun no mekanizmu kontrolu ba komvoiu sira, liuliu bainhira komvoiu liu hosi área residenzial iha oras kalan, atu prevene konflitu no impaktu ba seguransa komunidade.
Liga asuntu ne’e, STL tenta konfirma Komadante Komando Polísia Munisípiu Baucau, maibé seidauk hetan komentáriu, tanba Komadante inkomoda ho asuntu servisu balu.
(tom)
