ERMERA, STLTIMORLESTE.com — Autoridade lokál iha Ermera ezije kompaña ne’ebé responsabiliza ba projetu reabilitasaun estrada Gleno–Goulolo atu aselera servisu no tau aspal molok tama fulan Dezembru. Pedidu ne’e tanba preokupasaun kona-ba tempu udan ne’ebé besik ona.
Xefe Suku Humboe, Fransisco Magno Salsinha, preokupasaun komunidade kona-ba reabilitasaun estrada ne’e aumenta liután tanba iha tempu bailoron, rai rahun sa’e maka’as.
“Kona-ba rai rahun ne’e loos duni, tanba tempu bailoron, rai rahun, maibé kompaña ne’ebé mak sira uza ne’e tenke rega,” dehan nia ba jornalista sira iha Foho Hituria, Tersa-feira (22/09).
Nia hateten katak, kompara ho semana hirak liu ba bainhira nia ba Atsabe, kondisaun rai rahun agora la’ós ona hanesan uluk. Maski nune’e, komunidade ne’ebé uza motór sei presiza uza kapa tanba rai rahun sei iha nafatin.
Sublina katak, bainhira tama tempu udan, komunidade sira preokupa tebes. Tanba ne’e, autoridade lokál ezije nafatin kompaña ne’e atu aselera servisu, no ba parte estrada ne’ebé kompaña kee ona, tenke tau ona aspal.
Tuir nia, dalan hosi Tali Kotu to’o Goulolo Vila no ba foho sei sai susar tebes bainhira udan tun, se kompaña la aselera servisu. Tanba ne’e, nia husu ba kompaña ne’ebé halo ona servisu kee estrada atu, molok tama Dezembru, pelu menus alkatraun ka aspal goren tenke iha ona to’o Goulolo.
Tuir informasaun, kompaña agora daudaun halo hela servisu hosi parte Goulolo no Eraulu. Iha pakote ida ne’ebé hahú hosi Tali Kotu mai Ermera-Gleno, kompaña mos hahú daudaun ona halo servisu kee estrada.
Nia afirma katak, difikuldade boot ne’ebé komunidade enfrenta mak problema estrada ligasaun. Bainhira iha rai monu ka ponte tohar, hanesan akontese iha Lakugoa tinan hirak liu ba, komunidade sira susar atu hetan dalan alternativu.
Iha fatin hanesan, komunidade Tomas Da Silva hateten katak, bainhira tempu bailoron, difisil atu halo viajem ba mai, tanba rai rahun sa’e maka’as. Enkuantu iha tempu udan, komunidade sira hasoru difikuldade tanba kondisaun estrada la di’ak. Tanba ne’e, nia husu ba kompaña sira atu tau prioridade ba reabilitasaun estrada ne’e.
“Iha tempu bailoron ami liu iha estrada di’ak, maibé rai rahun sa’e. Agora iha tempu udan, ami komunidade, estudante sira no transporte públiku no privadu liu susar uitoan, tanba hanesan baibain ema tau iha média ne’e, estrada dodok loos. Ida ne’e mak sai hanesan preokupasaun boot ida ba ami,” nia dehan.
Hanesan reprezentante komunidade, nia husu atu kompaña ne’ebé kaer projetu sira ne’e halo servisu tuir kontratu ne’ebé iha, tanba estrada ne’e fasilita komunidade atu halo movimentu ba mai.
Hatan kona-ba asesu eletrisidade, nia dehan katak komunidade balu asesu ona, maibé sei iha bairru rua ne’ebé distánsia dook no seidauk asesu ba eletrisidade.
“Eletrisidade iha hotu ona, maibé iha bairru rua ne’ebé distánsia dook mak seidauk asesu. Tanba dook, komunidade rasik iha inisiativa uza subsídiu US$ 200 ne’ebé foin lalais simu hosi Oitavu Governu hodi sosa fiu,” dehan nia.
Nia hatutan katak, komunidade rasik iha inisiativa atu uza osan US$ 200 ne’ebé sira foin simu hodi sosa fiu elétriku. Hafoin sosa fiu, komunidade bolu tékniku sira mai atu halo instalasaun.
(ter)
